Падарункі пераможцам!

Падведзены вынікі фотаконкурсу “Імгненні жыцця”, арганізаванага раённай газетай “Савецкае Палессе”.

Фотаконкурс праводзіўся з 1 лютага па 1 жніўня 2014 года. За гэты час у рэдакцыю паступіла звыш 50 фотаработ. І перад журы, у склад якога ўваходзілі супрацоўнікі раёнкі, паўстала даволі складанае пытанне: каму аддаць перавагу — рэальна на перамогу прэтэндавала больш за 10 фотаработ. Хаця, забягаючы наперад, з вызначэннем ГРАН-ПРЫ не ўзнікла пытанняў, усе аднадушна выказаліся за канкрэтнага прэтэндэнта.

Нагадаем, што фотаконкурс праводзіўся па трох намінацыях. У першай — “Ганцаўшчына і ганцаўчане” — пераможцай стала Ніна Кавальчук з Хатыніч. Яе прыгожы здымак і цудоўны верш (“СП” № 53 ад 12.07.2014 г.), які нагадвае творы Сержпутоўскага — бясцэнныя скарбы, што дасталіся нам у спадчыну. Наступная намінацыя — “За здаровы лад жыцця”. На гэтую тэму было даслана ўсяго некалькі фотаработ і, улічваючы іх якасць, журы вырашыла не вызначаць пераможцу. У трэцяй намінацыі — “Беларусь маладая” — удзельнічала найбольшая колькасць чытачоў, таму, пасля абмеркавання, было прынята рашэнне адзначыць адразу двух удзельнікаў фотаконкурсу: Ларысу Амельяновіч з фотаработай, накшталт, прыгажосць выратуе свет (“СП” № 53 ад 12.07.2014 г.) і Людмілу Салодкіну за трыпціх пад умоўнай назвай “Модніца” (“СП” № 57 ад 26.07.2014 г.). Дарэчы, варта адзначыць, што большасць фотаработ на конкурс рэдакцыя атрымлівала па электроннай пошце і таму журы дакладна не ведала ўдзельнікаў, хто кім з’яўляецца. Аказалася, што Ларыса Амельяновіч працуе настаўнікам англійскай мовы ў гарадской гімназіі. Ужо ў тэлефоннай размове, пасля таго як па “электронцы” атрымала паведамленне аб выйгрышы, яна падзякавала за цудоўную ідэю правядзення такога фотаконкурсу. “Тут асабліва і прызы ролі не адыгрываюць, адна магчымасць змясціць фотаздымак свайго дзіцяці на старонках газеты многага каштуе”, — адзначыла Ларыса Валер’еўна. Самае цікавае, што за прозвішчам Салодкінай “хавалася” яшчэ адзін педагог гарадской гімназіі Людміла Зань — настаўніца рускай  мовы і літаратуры. “Я нават не чакала, што так атрымаецца — проста паслала фотаздымкі сваёй унучкі, — заўважыла яна. — Унучка з дачкой жывуць у Ізраілі, гасцявалі ў нас. Для іх фотаздымкі ў газете сталі сапраўдным падарункам. Узялі некалькі экзэмпляраў газеты з сабою…”.

Нарэшце, як адзначалася, ГРАН-ПРЫ журы аднагалосна прысудзіла фотарабоце гараджанкі Іны Яўсені пад умоўнай назвай “Дзяцей многа не бывае…” (“СП” № 37 ад 17.05.2014 г.). Аўтар без усялякага пафасу і надуманасці закранула, бадай, найважнейшую тэму вялікай дружнай сям’і і радасці мацярынства.

Прызёры фотаконкурсу атрымалі ад рэдакцыі “СП” падарункі, а Іна Яўсеня (НА ЗДЫМКУ), як уладальнік ГРАН-ПРЫ ўзнагароджана планшэтным камп’ютарам!

Рэдакцыя раённай газеты “Савецкае Палессе” выказвае ўдзячнасць усім удзельнікам фотаконкурсу, а таксама віншуе пераможцаў.

Павел СВІСТУНОВІЧ.