Загарадзь для… легкавушак

Узнімаючы з-пад колаў пырскі бруднай вады, вёрткі “Опель” сцішыў ход. Адчыніўшы дзверцу, вадзіцель збянтэжыўся. І было ад чаго. Уздоўж і ўпоперак, хто на што здатны, стаялі легкавушкі. Рызыкні, калі адважны, паспрабуй прыпаркавацца!

Размова ідзе аб добра вядомай аўтастаянцы ля гарадскога рынку. Каля трох гадоў назад ААТ “Модуль”  пачаў прыводзіць гэтую невялікую тэрыторыю ў належны стан. Рабочыя таварыства абгарадзілі яе, крыху выраўнялі грунт,  падсыпалі шчэбенем. Ішлі дні за днямі, месяцы за месяцамі. Для “Модуля” насталі цяжкія эканамічныя часы. Вядома, тут ужо не да якойсці аўтастаянкі — самім бы застацца на плыву.

Зараз гэтую тэрыторыю падтрымліваюць у парадку рабочыя гарадскога рынку. І гэта правільна. Тут паркуюць легкавушкі як мясцовыя жыхары, так і прадпрымальнікі  з суседніх гарадоў. Яны, скажам так,  забяспечваюць жыццядзейнасць рынку.

Паслухаем меркаванні вадзіцеляў.

Віталь (прозвішча не назваў), г. Бабруйск: — Аўтастаянка бясплатная, а што з гэтага? Нязручна, ніякай разметкі. Вадзіцелі ставяць машыны, дзе ўздумаецца, загароджваюць выезд іншым. Вось шукаю месца, каб лепш прыпаркавацца.

Іосіф Караневіч, г. Пінск: — У выхадныя прыязджаю на рынак гандляваць. Кожны раз бачу адзін і той жа малюнак. Аўтастаянка не заасфальтавана, усюды калдобіны. Калі спёка — пыл з-пад колаў, калі дождж — вада ў ямах.

Анатоль Ярашэвіч, в. Хатынічы: — На рынак прыехаў з жонкай і дзецьмі. Бачыце, як  у беспарадку стаяць аўтамабілі. Цяжка знайсці свабоднае месца.

Яўген Лойка, г. Ганцавічы: — Трэба, нарэшце, заасфальтаваць гэтую аўтастаянку, зрабіць разметку для паркоўкі. Тады ўсталюецца парадак. Вадзіцелі не будуць псаваць адзін аднаму настрой.

Побач з рынкам, ля абочыны вуліцы Кастрычніцкай, абсталяваны 22 парковачныя месцы. Тыя вадзіцелі, якія прыязджаюць раней, ставяць свае аўтамабілі тут. Астатнім нічога не застаецца, як выбіраць аўтастаянку ля рынку. А гэтая пляцоўка ўяўляе сабой звычайную загарадзь.

Задумка была вельмі добрай, а далей… Як тут не ўзгадаць выказванне вядомага расійскага палітыка: “Хацелі, як лепш — атрымалася, як заўсёды”.

Міхась АРЭШКА.