Медалі за адвагу і мужнасць

25 гадоў прайшло пасля таго, як савецкія войскі былі выведзены з Афганістана. 25 гадоў воінам-інтэрнацыяналістам, якія ўдзельнічалі тады ў ваенных дзеяннях, сняцца па начах кашмары. 25 гадоў маці, якія страцілі ў той вайне дзяцей, усё яшчэ вераць і чакаюць, што сын вернецца дамоў. Чакаюць, нягледзячы ні на што.

4 лютага 2014 выйшаў Указ Прэзідэнта Рэспублікі Беларусь № 60 аб устанаўленні юбілейнага медаля, якім ўзнагароджваюцца грамадзяне нашай рэспублікі, якія прайшлі Афганістан, у тым ліку і пасмяротна. У нашым раёне медалі было вырашана ўручыць 26 жніўня 2014 года.

Ва ўрачыстай абстаноўцы сабраліся ўсе воіны-інтэрнацыяналісты, якія прайшлі жахі Афганістана. Адважныя  мужчыны, здавалася, запоўнілі ўсю залу сваёй асаблівай энергетыкай. Апасля ўсіх кашмараў і выпрабаванняў яны застаюцца такімі велічна-смелымі і рашучымі. У вачах гэтых людзей свеціцца мужнасць і гатоўнасць прыйсці Радзіме на дапамогу, калі гэта спатрэбіцца. Яны выклікаюць вялікую павагу і гонар за краіну, якая выхавала такіх сыноў.

Кіраўнік раёна Аляксандр Саланевіч выступіў першым. Ён  падзякаваў ветэранаў за ўсё тое, што яны зрабілі для Радзімы і для ўсіх нас. Пажадаў усім здароўя, шчасця, дабра, але галоўнае — мірнага неба над галавой. Віншавалі воінаў-інтэрнацыяналістаў і вядучыя Яўген Тамашэня і Анастасія Уласень, і выканаўцы Алег Князскі, Алена Цецярдынка, Святлана Лапчук і ВІА “Палескі мінус”.

Уручаў медалі ваенны камісар Ганцавіцкага ваеннага камісарыята падпалкоўнік Валерый Касянюк.

Памяць загінуўшых у Афганістане ўшанавалі хвілінай маўчання. Медаль была ўручана маці загінуўшага воіна-інтэрнацыяналіста Мікалая Крысюка Алене Альбертаўне. Калі гэтая немаладая жанчына павольна ішла да сцэны, а потым цішком выцірала слёзы, было цяжка стрымацца, напэўна, усім прысутным. У гонар усіх мацярок, якія не дачакаліся сыноў з вайны, прагучала песня “Арыёза маці”.

З урачыстай прамовай выступіў воін-інтэрнацыяналіст Іван  Шаматульскі. Менавіта ён уручыў медаль “У памяць 25-годдзя заканчэння баявых дзеянняў” кіраўніку раёна Аляксандру  Саланевічу. Медаль кіраўнік раёна атрымаў на падставе хадайніцтва раённай арганізацыі грамадскага аб’яднання “Беларускі саюз ветэранаў вайны ў Афганістане” за значны ўклад у героіка-патрыятычнае выхаванне, увекавечанне памяці загінуўшых і развіццё ветэранскага руху.

Калі ўрачыстае мерапрыемства закончылася і ўсе выйшлі з будынка кінатэатра “Маладосць”, дзе яно адбывалася, стала бачна, што прайшоў дождж. Здавалася, само неба плакала па загінуўшых і тых, хто перанёс жахі той вайны.

Аляксандра ГУРМАН. Фота аўтара.