Вызначыўся першы фіналіст

23 жніўня на Ганцаўшчыне стартаваў турнір па футболе на прызы газеты “Савецкае Палессе” памяці Васіля Фёдаравіча Праскурава.  У суботу і нядзелю адбыліся  чвэрцьфінальныя сустрэчы і адзін паўфінал, па выніках якога вызначыўся першы фіналіст спаборніцтваў. Ім стала ганцавіцкая каманда “Атлант”.

Але спачатку пра гульні 1/4 фіналу. У суботу ў Люсіне мясцовая каманда гуляла супраць “Арбіты” з Азярэчча. З першых хвілін гульні гаспадары завалодалі перавагай і мелі некалькі неблагіх шанцаў для таго, каб адкрыць лік. У сярэдзіне першага тайма ігрок “Арбіты” згуляў рукой у сваёй штрафной плошчы, але люсінскія футбалісты нерэалізавалі адзінаццацімятровы ўдар.  Аднак напрыканцы першай паловы, пасля няўпэўненай гульні галкіпера “Арбіты”, гаспадары ўсё ж адкрылі лік.

У другой палове сустрэчы каманда “Люсіна” цалкам кантралявала гульню і да канца матча здолела забіць яшчэ два галы. Такім чынам,  люсінскія футбалісты атрымалі перамогу з лікам 3:0 і сталі першымі паўфіналістамі турніру.

Сустрэча паміж камандамі “Агарэвічы — ДЮСШ” і “Чудзін”  праходзіла з перавагай рабят з ДЮСШ і завяршылася іх перамогай з лікам 2:0. Галы на свой рахунак у гэтым матчы запісалі Рынат Бобка і Андрэй Рабцэвіч, які адправіў мяч у вароты цудоўным ударам са штрафнога.

У Хатынічах мясцовая каманда нечакана саступіла гасцям з Малькавіч з лікам 0:3.  Заўважым, што гаспадары ў гэтым матчы гулялі не ў самым аптымальным складзе.

Нарэшце, самым цікавым і захапляючым чвэрцьфінальным паядынкам стала гульня паміж дзвюмя мацнейшымі камандамі раёна — “Атлантам” і “Будаўніком — ПМК-14”. Адзначым, што ў складзе як адной, так і другой каманды адсутнічалі некалькі вядучых футбалістаў (удзельнікаў чэмпіянату Беларусі і Брэсцкай вобласці), аднак гульня, тым не менш, парадавала прыхільнікаў футбола і трымала ў напружанні да фінальнага свістка.

У першым тайме было цяжка аддаць перавагу адной з каманд. Сапернікі асцярожнічалі і момантаў ля варот адзін аднаго стварылі няшмат. А вось другі тайм атрымаўся вельмі цікавым. У самым яго пачатку каманда “Будаўнік — ПМК-14” пасля розыгрышу штрафнога адкрыла лік. Хутка паўабаронца намінальных гасцей Сяргей Зялёнка адправіў і другі мяч у вароты “Атланта”. Здавалася, што гаспадары не здолеюць выратаваць гэтую гульню, аднак футбалісты “Атланта” праявілі сапраўдны характар і не толькі зраўнялі лік, але і перамаглі.  За 13 мінут да канца сустрэчы Юрый Наплёха адыграў адзін гол. Праз некаторы час гуляючы трэнер “Атланта” Андрэй Жалезны бліскучым ударам здалёк зраўняў лік, а напрыканцы матча Аляксей Сукач, пасля перадачы Андрэя Ганіча, прынёс гаспадарам перамогу — 3:2.

Менавіта “Атлант” стаў і першым фіналістам спаборніцтваў.  У нядзелю, нягледзячы на неспрыяльнае надвор’е, адбыўся адзін з двух паўфіналаў. Каманда “Атлант” упэўнена перамагла “Агарэвічы — ДЮСШ” з лікам 4:0. У гэтай сустрэчы галы на свой рахунак запісалі Андрэй Ганіч, Аляксандр Рабцэвіч, Юрый Сайка і Віктар Курылік.

Уладзімір Сакалоў.