ХУТКА І ЯКАСНА

У карагодзе гонкіх сосен ля вёскі Палонь размясціўся невялікі ўчастак пасеваў азімага трыцікале — усяго 10 гектараў. Калі мы сюды пад’ехалі, камбайнеры заканчвалі абмалот калоссяў на апошніх метрах. Па сагрэтым  сонцам полі плаўна плылі два збожжаўборачныя камбайны. Услед за імі шпарка рухаўся прэспадборшчык — цюкаваў у рулоны салому.

— Уборачныя работы вядуцца рытмічна, — расказвае галоўны аграном СВК “Цельшына” Дзмітрый Бруй. — Намалочанае зерне без прамаруджвання дастаўляецца на сушыльны комплекс. Яго трэба як мага хутчэй перапрацаваць — ачысціць, калі патрабуецца, ад рэшткаў пустазелля, прасушыць да патрэбнай кандыцыі. Ураджайнасць азімага трыцікале добрая. У сярэднім з гектара атрымалі  больш чым 30 цэнтнераў зерня. На асобных участках, дзе папярэднікамі былі прапашныя і бабовыя культуры, намалот дасягаў 50 цэнтнераў з гектара.

У гаспадарцы спаўна выкарыстоўваюць спрыяльнае сонечнае надвор’е. Хутка і якасна ўбралі на 400-гектарнай плошчы азімае жыта. Гэтая культура таксама парадавала, зраўняўшыся з ураджайнасцю азімага трыцікале.

Галоўныя ўдзельнікі жніва — камбайнеры. Сяргей Бабок разам з Васілём Рылкам камбайнам “КЗС-10” выдалі з бункера больш чым 500 тон зерня. Экіпаж дружны, вопыту і майстэрства, як кажуць, яму не пазычаць. Розніца толькі ў тым, што Васіль працуе шафёрам у раённым аддзеле па надзвычайных сітуацыях, а напярэдадні жніва бярэ водпуск і садзіцца за штурвал камбайна.  Адвозяць зерне з палёў два вадзіцелі “МАЗаў”  Уладзімір і Мікалай Жалезныя. На прэспадборшчыку стараннем вызначаецца трактарыст Віктар Бабок. Ён добра разумее, што трэба найхутчэй  зацюкаваць у рулоны  салому, каб яна не стрымлівала  падрыхтоўку глебы  пад будучы ўраджай.

Убіраць азімыя культуры нялёгка, а тым больш — палеглыя. А такіх у гаспадарцы каля 70 працэнтаў ад агульнай плошчы.  І ўсё ж, дзякуючы прафесіяналізму, кожны экіпаж за дзень убірае 13 — 15 гектараў зернявых, намалочваючы 50 — 60 тон зерня. Стараюцца і аператары сушыльнага комплексу Анатоль Васілевіч і Аляксандр Варвашэвіч.

Камбайнеры гаспадаркі прыступілі і да ўборкі яравых зернявых — пачалі з абмалоту ячменю. Ураджайнасць і тут высокая. У сярэднім з гектара атрымліваецца каля 30 цэнтнераў зерня. Гэтую культуру на 500-гектарнай плошчы ў СВК “Цельшына” мяркуюць убраць у сціслы тэрмін — за 7 — 10 дзён. Агульны намалот чакаецца важкі — каля 3 тысяч тон збожжа. Ураджайнасць складзе, паводле прагнозаў, 30 цэнтнераў зерня ў сярэднім з гектара — на 10 цэнтнераў больш, чым летась.

Паспяховаму і якаснаму правядзенню жніва садзейнічае зладжаная, без перабольшвання, самаадданая праца ўсіх удзельнікаў уборкі.

Міхась АРЭШКА.

НА ЗДЫМКАХ: экіпаж камбайнераў у складзе Сяргея Бабка (злева) і Васіля Рылкі; напаўняецца кузаў зернем новага ўраджаю.