Новы магазін і кафетэрый

Урачыстае адкрыццё новага магазіна і кафетэрыя райспажыўтаварыства адбылося ў мінулую суботу. Агульная плошча гандлёвых кропак складае 105,8 квадратнага метра. На ўзвядзенне затрачана 750 мільёнаў рублёў.      

На скрыжаванні аўтатрасы Ганцавічы — Лунінец і аб’язной дарогі, на месцы былога паста ваеннай аўтаінспекцыі ўжо даўно планавалася адкрыць аб’ект прыдарожнага сэрвісу.

“Амаль два гады цягнулася ўзгадненне дакументацыі на адкрыццё гэтага гандлёвага аб’екта, але нарэшце, жыхары вёскі Ганцавічы, райцэнтра і, безумоўна, падарожнікі атрымалі сучасную гандлёвую кропку, дзе можна набыць як усе неабходныя прадукты харчавання, так і адпачыць, перакусіць у камфортнай абстаноўцы, — адзначыў у сваім выступленні падчас урачыстага адкрыцця кіраўнік раёна Аляксандр Саланевіч. — Гэта яшчэ раз сведчыць, што трэба даказваць сваю правату і дабівацца свайго, нягледзячы ні на што”.

Тое, што гэты аб’ект прыдарожнага сэрвісу запатрабаваны, падкрэслівала зацікаўленасць мясцовых жыхароў, якія прыйшлі на адкрыццё.

Разам з гэтым, як адзначыў старшыня райспажыўтаварыства Аляксандр Селюжыцкі, плануецца стварыць яшчэ больш прывабныя ўмовы для падарожнікаў і пабудаваць каля магазіна летнюю пляцоўку для адпачынку, дзе таксама будуць аказвацца дадатковыя паслугі. У сваю чаргу, Аляксандр Саланевіч заўважыў, што гэты гандлёвы аб’ект павінен стаць візітнай карткай Ганцавіч, дзе самыя лепшыя і якасныя прадукты харчавання і высокі ўзровень абслугоўвання.

На ўрачыстым адкрыцці магазіна і кафетэрыя не абышлося без сюрпрызу. Пасля таго, як чырвоную стужку перарэзалі кіраўнік раёна Аляксандр Саланевіч, старшыня райспажыўтаварыства Аляксандр Селюжыцкі і загадчыца гандлёвага аб’екта Галіна Бандарэнка, прадаўцы запрасілі прысутных зрабіць пакупкі. І першы з іх, дырэктар Ганцавіцкага хлебазавода Андрэй Арцёменка, атрымаў падарунак — бутэльку шампанскага і каробку цукерак. З яго лёгкай рукі зараз у магазіне ідзе даволі бойкі гандаль — штодзённая выручка даходзіць да 10 мільёнаў рублёў, што таксама яскравае сведчанне запатрабаванасці гандлёвай кропкі прыдарожнага сэрвісу менавіта ў гэтым месцы.

Аляксей ГРУШЭВІЧ. Фота тара.