Абмежаванне наведавання лясоў

Абмяжоўваецца наведванне насельніцтвам лясоў і заезд у іх транспартных сродкаў без дазволу органаў лясной гаспадаркі з 29 ліпеня 2014 года да асобнага распараджэння.

Спякота

У гэтыя ліпеньскія дні ўсталявалася спякотнае надвор’е. Па прагнозах сіноптыкаў сёння і заўтра паветра прагрэецца да 29 — 34 градусаў цяпла, што адпавядае аранжаваму ўзроўню небяспекі.

Выратавальнікі і медыкі папярэджваюць аб небяспецы цеплавога перагрэву. Гарачыня можа прывесці да хуткага абязводжвання арганізма, развіцця сонечнага і цеплавога ўдараў, абвастрэння сардэчна-сасудзістых захворванняў.

У час спякотнага надвор’я варта як можна менш знаходзіцца пад прамымі сонечнымі промнямі. Калі ж гэта непазбежна, то абараняйце галаву галаўнымі ўборамі ці парасонамі. Памятайце, што з 12 і да 16 гадзін сонца найбольш актыўнае. Таму ў гэты час пажадана абараняць усе ўчасткі цела ад сонечных промняў — выкарыстоўвайце закрытае адзенне і сонцаахоўны крэм. Ні ў якім разе не ўжывайце алкаголь — у спякоту яго дзеянне на арганізм шматкратна ўзмацняецца, да таго ж арганізм становіцца больш адчувальным да высокіх тэмператур. Імкніцеся ўжываць як мага больш вадкасці — ахалоджанай пітной ці мінеральнай вады. Сачыце за захоўваннем прадуктаў харчавання — пры спякоце бактэрыі размнажаюцца вельмі хутка, што можа прывесці да цяжкіх атручванняў. Не карыстайцеся дэкаратыўнай касметыкай ўвогуле, ці выкарыстоўвайце яе па самым мінімуме: скура чалавека ў спякоту ўзмоцнена дыхае і пацее, тым самым зніжаючы тэмпературу цела. Закупорка пораў можа прывесці да перагрэву арганізма.

Больш таго, нельга займацца актыўным спортам пры тэмпературы звыш 25 градусаў цяпла, а таксама варта захоўваць спакой: любая ўзбуджальнасць узмацняе рызыку ўзнікнення цеплавога і сонечнага ўдараў.

І, безумоўна, неабходна абмежаваць працяглыя паездкі на аўтамабілі. Калі такой магчымасці няма, то варта быць максімальна ўважлівым на дарозе, бо ў спёку можа пагоршыцца самаадчуванне, прытупіцца ўважлівасць і знізіцца рэакцыя.

Раённы аддзел

па надзвычайных

сітуацыях.