ЗАЎЖДЫ НА ПАСТУ

Служба выратавальнікаў-пажарных не падзяляецца на час работы і адпачынку. Прафесія абавязвае заўжды быць гатовым прыйсці на дапамогу. І нават напярэдадні прафесійнага свята — Дня пажарнай службы, у размове начальнік раённага аддзела па надзвычайных сітуацыях Андрэй Лабко больш закранае  праблемныя пытанні, звязанныя з пажарнай бяспекай. А іх хапае.

Толькі за мінулы тыдзень у раёне адбылося тры пажары: у Хатынічах гарэла надворная пабудова, у райцэнтры запалаў аўтамабіль, трагедыяй закончыўся пажар у Малькавічах — ноччу 20 ліпеня ва ўласным доме загінуў пажылы мужчына. Ён не ўжываў алкаголь, але вельмі шмат курыў… Усяго з пачатку года на Ганцаўшчыне зарэгістравана 30 пажараў, загінулі 2 чалавекі.

Як адзначае Андрэй Васільевіч, у 18 выпадках прычынай узгарання стала неасцярожнае абыходжанне з агнём пры курэнні. Гэта на 8 выпадкаў больш, чым летась. “Пераважная большасць пажараў і гібель на іх людзей адбываюцца па згаданай прычыне, — гаворыць начальнік РАНС. — Між іншым, праводзіцца вялікая прафілактычная работа: абследуем домаўладанні, выносім рэкамендацыі і прадпісанні па забеспячэнні пажарнай бяспекі. Працуем разам з сельвыканкамамі, работнікамі сацыяльных службаў, супрацоўнікамі міліцыі, але колькі б мы не імкнуліся звесці да мінімуму фактары рызыкі, без намаганняў усяго грамадства не атрымаем жаданага выніку. Калі чалавек, напрыклад, злоўжывае спіртнымі напіткамі, то яго варта трымаць пастаянна пад кантролем, а гэта магчыма, калі людзі, якія жывуць вакол яго, не будуць заставацца раўнадушнымі…”.

Сапраўды, пытанні пажарнай бяспекі адсочваюць многія службы, але нельга заставацца ў баку і жыхарам раёна. “Калі бачыце, што ёсць праблема — нельга маўчаць, — працягвае размову Андрэй Лабко. — Сусед злоўжывае спіртнымі напіткамі і курыць? Сваімі дзеяннямі ён пагражае не толькі сабе, але і сем’ям, якія жывуць побач — агонь бязлітасны і знішчае ўсё на сваім шляху. Таму не маўчыце — ёсць сельвыканкам, міліцыя, тэлефануйце нам — галоўнае прадухіліць трагедыю…”.

Між іншым, варта адзначыць, што яшчэ да 2000 года на Ганцаўшчыне ў сярэднім за год рэгістраваліся 70 — 80 пажараў, з 2000 па 2005 — 50 — 60, а пачынаючы з 2006 года гэты паказчык усталяваўся ў межах 40 пажараў у год. Зразумела, год на год не прыходзіцца, але тэндэнцыя сведчыць аб планамерным зніжэнні колькасці ўзгаранняў. Зразумела, пазбегнуць іх проста немагчыма, але трымаць сітуацыю пад кантролем якраз і дае магчымасць увесь комплекс прафілактычных мерапрыемстваў, што праводзяцца выратавальнікамі-пажарнымі разам з усімі зацікаўленымі службамі. Хаця ёсць і нерэгулюемыя фактары рызыкі. Напрыклад, толькі летась у раёне адбылося 7 пажараў, прычынай якіх сталі разрады маланкі.

На сённяшні дзень у райаддзеле па надзвычайных сітуацыях нясуць службу 66 чалавек. “Мы амаль поўнасцю вырашылі кадравае пытанне, — адзначае Андрэй Васільевіч. — А з 1 жніўня, калі прыйдуць некалькі маладых супрацоўнікаў, яно будзе закрыта. Увогуле, у нас працуе зладжаны калектыў аднадумцаў. І напярэдадні прафесійнага свята хацелася б пажадаць усім сваім таварышам, найперш, сухіх “рукавоў”, здароўя, шчасця і сямейнага дабрабыту”.

Аляксей ГРУШЭВІЧ.