Сакаўныя ягады — чарніцы

На зборы чарніц людзі зарабляюць неблагія грошы, атрымлівае прыбытак ад рэалізацыі гэтых ягад і райспажыўтаварыства.

Начальнік аддзела нарыхтовак Алег Бышнеў адзначае, што адзін з самых ураджайных сезонаў прыйшоўся на 2012 год. Тады закупілі ў насельніцтва 160 тон чарніц. Прыбытак ад рэалізацыі склаў 103 мільёны рублёў. Але, як кажуць, год на год не прыходзіцца. Летась удалося нарыхтаваць менш — 109 тон, сёлета, па прагнозных паказчыках, будзе яшчэ менш. Пакуль у маразільныя камеры райспажыўтаварыства закладзена 40 тон чарніц.

На ўраджайнасць лясных ягад значны ўплыў аказваюць прыродныя фактары. Сёлетні год — не выключэнне. Адчувальную шкоду ягаднікам нанеслі майскія замаразкі. Асабліва пацярпелі чарніцы, якія пачалі цвісці ў канцы красавіка. На сёлетні ўраджай адмоўна паўплывала і леташняя жнівеньская спёка. Недахоп вільгаці не дазволіў кусцікам належным чынам развіць кветкавыя пупышкі. Такія высновы зрабілі ў Міністэрстве прыродных рэсурсаў і аховы навакольнага асяроддзя.

Раней чарніцы закладвалі ў аміячныя маразільныя камеры, зараз іх пераабсталявалі на фрэонавыя. Яны больш бяспечныя, зручныя і эканамічныя. Прычым, паставілі дзве дадатковыя, агульнай умяшчальнасцю 60 тон. Такім чынам, шэсць маразільных камер здольны захоўваць 180 тон чарніц.

Калі ў пачатку сёлетняга сезона адзін кілаграм чарніц каштаваў 15 тысяч рублёў, то зараз ён знаходзіцца ў межах ад 31 да 33 тысяч рублёў.

Адзначым, што нарыхтоўшчыкі закупляюць чарніцы не толькі ў мясцовага насельніцтва, але і ў жыхароў Пінскага і Салігорскага раёнаў. Руплівасцю вызначаюцца Анжэла  Мельнік, Надзея Сташанін, Аляксандр Віннік, Ганна Муха, Жанна Бур’як.

Замарожаныя сакаўныя ягады карыстаюцца попытам не толькі ў айчынных спажыўцоў, але і ў замежных. Іх ахвотна набываюць прадпрымальнікі з Польшчы, Літвы і Латвіі. Гэта асноўныя імпарцёры.

Акрамя чарніц калектыў аддзела нарыхтовак райпо закупляе яблыкі, журавіны, парэчкі, грыбы, іншую прадукцыю прысядзібных участкаў і лясоў.

Міхась АРЭШКА.