Дадатковыя правы

У сувязі з уступленнем у сілу з 26 чэрвеня 2014 года новай рэдакцыі Правілаў вядзення рыбалоўнай гаспадаркі і рыбалоўства, у паляўніцтвакарыстальнікаў з’явіліся новыя правы.

Адказныя асобы арандатараў паляўнічых угоддзяў, у тым ліку паляўніцтвазнаўцы, інжынеры па паляўнічай гаспадарцы, егеры атрымалі права даглядання транспартных сродкаў, рэчаў, прадукцыі і прылад палявання асоб, якія падазраюцца ў браканьерстве. Дагляданне дазволена праводзіць толькі на тэрыторыі паляўнічых гаспадарак. Такая мера накіравана на ўзмацненне кантролю за браканьерамі і зніжэнне да мінімуму выпадкаў незаконнай здабычы жывёл.

Падставамі для праверкі могуць служыць: выяўленне адказнай асобай карыстальніка паляўнічых угоддзяў фізічнай асобы, якая пераносіць (перавозіць, перасоўвае) рэчы ў час незаконнай здабычы аб’ектаў жывёльнага свету або непасрэдна пасля яе здзяйснення; паведамленне сведкаў аб тым, што асоба дапусціла парушэнне правілаў вядзення паляўнічай гаспадаркі і палявання; наяўнасць падстаў меркаваць, што ў падазронага ў браканьерстве маюцца прылады або прадукцыя незаконнага палявання; наяўнасць на адзенні і (або) рэчах чалавека слядоў здзяйснення дзеянняў, у тым ліку крыві, шэрсці жывёл, што ўказваюць на незаконнае паляванне; наяўнасць іншых абставін (брэх сабак, выстралы са зброі, выяўленне туш здабытых паляўнічых жывёл або іх частак), якія даюць падставы меркаваць, што асоба мела дачыненне да парушэння заканадаўства аб вядзенні палявання.

Дагляданне рэчаў павінна праводзіцца ў прысутнасці іх уладальніка і суправаджацца складаннем пратакола. Дагляданне рэчаў, уладальнік якіх не ўстаноўлены або знік, праводзіцца пры наяўнасці абставін, якія даюць падставы меркаваць, што ўказаныя рэчы ўтрымліваюць прылады або прадукцыю незаконнага палявання.

Пры неабходнасці прымянення адміністрацыйнага затрымання адказныя асобы карыстальніка паляўнічых угоддзяў павінны праінфармаваць аб гэтым органы, адказныя асобы якіх ва ўстаноўленым парадку маюць паўнамоцтвы ажыццяўляць адміністрацыйнае затрыманне.

Эдуард ШУЛЯК, дырэктар раённай арганізацыйнай структуры “Беларускае таварыства паляўнічых і рыбаловаў”.