Разам з мамай у дзіцячы садок

Не першы год на базе дзіцячага садка № 7 дзейнічае адаптацыйная група “Тапатушкі”. У гэтым годзе яна зноў расчыніла свае дзверы перад нашымі малымі — тымі, хто ў гэтым годзе ўпершыню пойдзе ў дзіцячы садок. Рабяты маюць магчымасць наведваць групу на працягу месяца двойчы на тыдзень з 10.30 да 12.30.

На парозе, як кажуць, мам і рабят ветліва сустрэла загадчыца дзіцячага садка Алена Іванаўна Кучма, якая і пазнаёміла нас з асаблівасцямі групы, выхавальнікамі, якія будуць працаваць з дзецьмі, правяла экскурсію па ўстанове.

Тут вопытныя выхавальнікі Марына Раманаўна Шкут, Тамара Яўгенаўна Хандрыка прапануюць рабятам розныя віды дзейнасці, далучаючы сваіх будучых выхаванцаў да свету гульняў і ведаў. Разам з казачнымі героямі, рабяты вучацца маляваць, ляпіць, вырабляць аплікацыі, выконваюць практыкаванні, якія развіваюць каардынацыю і спрыт. Педагог-псіхолаг Галіна Канстанцінаўна Бобка праводзіць з малымі розныя гульні, якія дапамагаюць зняць напружанне, займае рабят агульнай дзейнасцю. Прыемна назіраць, як дзеці знаёмяцца, вучацца ўзаемадзейнічаць, праяўляюць сімпатыі.

Вялікае захапленне  і сапраўдны фантан пачуццяў выклікаюць у малых заняткі з музычным кіраўніком Анастасіяй Аляксандраўнай Грыцкевіч і кіраўніком фізвыхавання Аленай Піліпаўнай Ясько, якія праходзяць у актавай зале. Тут рабяты танцуюць, развучваюць дзіцячыя песенькі, гуляюць з мячамі, пераадольваюць палосы перашкод. У зале гучыць вясёлая музыка, пануе атмасфера свята і весялосці.

На працягу ўсіх заняткаў у дзіцячым садку побач з малышамі знаходзяцца іх мамы, што, безумоўна, надае ім упэўненасці ў сабе. Мамы ж не толькі гуляюць са сваімі дзецьмі, але і маюць магчымасць атрымаць кансультацыю вопытных педагогаў. Вельмі пазнавальнай і цікавай была гутарка з дэфектолагам Таццянай Леанідаўнай Занька, якая дала рэкамендацыі мамам па развіцці мовы малышоў, адказала на цікавячыя нас пытанні.

Актыўны ўдзел у рабоце адаптацыйнай групы прымае намеснік загадчыка па асноўнай дзейнасці ўстановы Іна Сяргееўна Трэфілава. Яна ўважліва, чула кіруе работай групы, са шчырым клопатам і ўвагай адносіцца да мам і іх дзяцей.

Нават пасля першага наведвання адаптацыйнай групы мой сын чакае гэтых дзён з нецярпеннем, і пытае, калі мы пойдзем зноў у садок. Канечне, яму, як і іншым дзецям, прыйдзецца навучыцца хадзіць у дзіцячы садок без мамы, але, думаю, пасля наведвання гэтай групы, яго адаптацыя пройдзе лёгка. Ён ужо знаёмы з памяшканнем, персаналам, многімі рабятамі, якія будуць наведваць садок разам з ім. Але самае галоўнае — у майго дзіцяці сфарміраваліся станоўчыя адносіны да дзіцячага садка, для яго гэта тое месца, дзе весела і цікава, дзе яго любяць і чакаюць.

Марыя РЭБКАВЕЦ, жыхарка г. Ганцавічы. Фота аўтара.