Летні адпачынак у “Алімпе”

На працягу трох тыдняў больш за 130 дзяцей Ганцаўшчыны адпачывалі ў спартыўна-аздараўленчым лагеры “Алімп”, які працаваў пры дзіцяча-юнацкай спартыўнай школе прафкама СВК “Агарэвічы”.

На базе СШ № 1, Агарэвіцкай, Хатыніцкай сярэдніх школ і Люсінскага дзіцячага сада — сярэдняй школы рабяты з карысцю правялі свой вольны час. Паміж юнакамі і дзяўчатамі з першых дзён лагернай змены наладзіліся сяброўскія адносіны, якія, безумоўна, засталіся і пасля яе заканчэння. У спартыўна-аздараўленчым лагеры “Алімп” рабяты гулялі ў футбол, настольны тэніс, дартс, шашкі, шахматы, прымалі ўдзел у шматлікіх агульналагерных мерапрыемствах, удзельнічалі ў розных спартыўных  спаборніцтвах.

А самым запамінальным момантам адпачынку сталі паездкі ў Лунінец і Салігорск. У Лунінцы нашы юныя футбалісты правялі таварысцкую гульню па футболе супраць мясцовых рабят. Таксама ўсе дзеці наведалі Лядовы палац, дзе кожны жадаючы мог пакатацца на каньках. А ў Салігорску рабяты пабывалі дзякуючы нашаму земляку, футбалісту Ігару Бобку, які ў гэтым сезоне выступае ў Вышэйшай лізе чэмпіянату Беларусі па футболе ў складзе каманды “Слуцк”. Дык вось, менавіта Ігар даў магчымасць дзецям бясплатна наведаць паядынак чэмпіянату Беларусі паміж футбольнымі клубамі “Слуцк” і “Нёман”, які праходзіў у Салігорску. Ганцавіцкія юнакі і дзяўчаты падрыхтаваліся да гульні: сваімі рукамі намалявалі некалькі плакатаў у падтрымку Ігара Бобкі і яго каманды. На жаль, “Слуцк” саступіў сваім сапернікам з лікам 0:2, але наш зямляк быў адным з лепшых на полі ў складзе сваёй каманды.

Паражэнне “Слуцка” не сапсавала рабятам настрой ад паездкі. Тым больш, што пасля матча ўсе ўдзельнікі экскурсіі мелі магчымасць сфатаграфавацца з Ігарам Бобкам на памяць.

А закончылася лагерная змена цікавым паходам на возера Чырвонае, дзе рабяты адпачылі на ўлонні прыроды, а таксама паспаборнічалі ў гульні “Зарніца”. Пасля яе заканчэння лепшыя спартсмены і найбольш актыўныя юнакі і дзяўчаты спартыўна-аздараўленчага лагера “Алімп” атрымалі салодкія падарункі.

Вось і скончыўся адпачынак у лагеры, які падарыў дзецям шмат уражанняў і цудоўнага настрою.

НА ЗДЫМКУ: фота на памяць з Ігарам Бобкам падчас экскурсіі ў Салігорск.

Уладзімір САКАЛОЎ.

Фота Дзмітрыя МАТУЛІСА.