Юбілей Васіля Быкава

Сёлета наша краіна адзначае 70-годдзе з дня вызвалення Беларусі ад нямецка-фашысцкіх захопнікаў. Семдзесят гадоў наш народ не ведае вайны, семдзесят гадоў Беларусь квітнее пад мірным небам. І сімвалічна, што ў чэрвені мы адзначаем юбілей славутага беларускага пісьменніка Васіля Быкава — чалавека-легенды і гонару нацыі.

Да самых апошніх дзён жыцця, нягледзячы на ўсе грамадска-палітычныя змены, на нечаканыя і далёка не заўсёды прыемныя і жаданыя перамены ў асабістым лёсе, не лепшы стан здароўя, Васіль Быкаў жыў напружаным актыўным творчым жыццём. Ён — пісьменнік з сусветным імем. У ягоным таленце не сумняваліся нават самыя ваяўнічыя крытыкі.

Праўдзівыя словы пра легендарнага пісьменніка пісаў Чынгіз Айтматаў. “Лёс збярог нам Васіля Быкава, каб ён жыў і пісаў ад імя цэлага пакалення, ад імя тых, хто спазнаў вайну і ўзмужнеў духам са зброяй у руках, для якіх дзень жыцця быў роўны веку жыцця”.

На мінулым тыдні ў гарадскім Доме культуры прайшоў вечар-партрэт “Я беларус — мая мова родная, беларуская…”, прысвечаны жыццю і творчасці Васіля Быкава.

Вялікая зала ГДК была запоўнена амаль поўнасцю. На мерапрыемства, арганізаванае супрацоўнікамі раённай бібліятэкі імя В. Ф. Праскурава, запрасілі моладзь.

Таленавіта і яскрава чыталі вершы беларускіх паэтаў, урыўкі з твораў Васіля Быкава вучні СШ № 3 Ягор Кулан, Насця Варвашэвіч і Маша Сяргейчык. Асабліва кранула ўсіх прысутных тэатралізаваная пастаноўка па аповесці Васіля Быкава “Альпійская балада”. Вучні Агарэвіцкай СШ Вераніка Клявец і Раман Лелес артыстычна выканалі ролі беларускага хлопца Івана і італьянскай дзяўчыны Джуліі, якіх звялі трагічныя абставіны вайны ў аўстрыйскіх Альпах.

Дэманстраваўся дакументальны фільм пра жыццё і творчасць пісьменніка, гучала музыка і песні.

Васіль Быкаў пражыў жыццё сапраўднага беларуса — любіў сваю краіну, мову, народ. І песня “Мая Беларусь”, якая прагучала напрыканцы вечарыны, нібыта з’яднала ўсіх прысутных у адным парыве, запоўніла залу мелодыяй свабоды і данесла галоўную думку: мы — беларусы і павінны з гонарам звацца імі.

Таццяна Маляўка, загадчык аддзела бібліятэчнага маркетынгу ЦРБ імя В. Ф. Праскурава.