Праверка дзяржзаказчыкаў

Пастаянны кантроль ажыццяўляе Камітэт дзяржкантролю Брэсцкай вобласці за выкананнем заканадаўства пры будаўніцтве, рэканструкцыі, а таксама за эфектыўным выкарыстаннем бюджэтных сродкаў, што выдзяляюцца на гэта.

У ходзе праверкі КУП “Лунінецкае раённае ўпраўленне капітальнага будаўніцтва” ўстаноўлена, што прадпрыемства пры выкананні функцый дзяржаўнага заказчыка не ў поўнай меры забяспечвае выкананне патрабаванняў заканадаўства аб архітэктурнай, горадабудаўнічай і будаўнічай дзейнасці ў выніку чаго дапушчана завышэнне кошту будаўніча-мантажных работ на агульную суму 66,9 мільёна рублёў.

Акрамя гэтага не выконваюцца належным чынам функцыі па тэхнічным наглядзе за будаўніцтвам, рэканструкцыяй і капітальным рамонтам будынкаў. Напрыклад, у сярэдняй школе вёскі Вулька-2 выкананне будаўніча-мантажных работ ажыццяўлялася з адступленнем ад праектна-каштарыстай дакументацыі, а частка закупленага абсталявання не выкарыстоўваецца. Таксама ўстаноўлены факты несвоечасовага ўхілення дэфектаў, выяўленых у гарантыйны перыяд эксплуатацыі плавальнага басейна ў Лунінцы.

Падобныя парушэнні часта выяўляліся і пры праверках упраўленняў капітальнага будаўніцтва іншых раёнаў.

Разам з гэтым, з 1 красавіка 2014 года ўступіў у сілу Указ Прэзідэнта Рэспублікі Беларусь ад 14.01.2014 года № 26 “Аб мерах па ўдасканаленню будаўнічай дзейнасці”, у якім прадугледжана значна большая, чым раней, адказнасць службовых асоб заказчыка пры ажыццяўленні будаўнічай дзейнасці, а таксама ўстаноўлена, што падрадчык абавязаны даваць заказчыку, забудоўшчыку забеспячэнне выканання сваіх абавязацельстваў па ўхіленню дэфектаў у перыяд гарантыйнага тэрміну эксплуатацыі адной з наступных форм:

— зарэзерваваць на спецрахунку на перыяд дзеяння гарантыі сродкі ў памеры 1,5 працэнта кошту выкананых на аб’екце работ;

— прадставіць банкаўскую гарантыю;

— заключыць дагавор страхавання адказнасці за невыкананне альбо неналежнае выкананне абавязацельстваў па гарантыі (страхавыя ўзносы не ўключаюцца падрадчыкам у затраты).

У будучым меры, прадугледжаныя згаданым Указам, дазволяць у гарантыйны перыяд эксплуатацыі аб’ектаў аператыўна выпраўляць выяўленыя дэфекты і работы неналежнай якасці.