Тры дзяржавы — адзінае рашэнне

“Саюзная ўборка” — акцыя па навядзенні парадку і добраўпарадкаванні тэрыторый пройдзе ў адзіны дзень на тэрыторыі адразу трох дзяржаў: Беларусі, Расіі і Казахстана.

Правядзенне такой маштабнай акцыі ініцыіравала Міністэрства прыродных рэсурсаў і аховы навакольнага асяроддзя Рэспублікі Беларусь. Па выніках сустрэчы міністраў прыродаахоўных ведамстваў Беларусі, Расіі і Казахстана было прынята рашэнне, у якім фармаце пройдзе “Саюзная ўборка”. Таксама быў вызначаны адзіны дзень — 5 чэрвеня, дата, сімвалічная для ўсіх эколагаў і нераўнадушных да экалагічных праблем — Сусветны дзень навакольнага асяроддзя.

Плануючы правядзенне гэтай акцыі, яшчэ раз падкрэсліваецца, што, з’яўляючыся членамі розных інтэграцыйных аб’яднанняў — Саюзнай дзяржавы, Мытнага саюза — Беларусь гатова вырашаць усе праблемы разам, у тым ліку і экалагічныя.

У краіне да “Саюзнай уборкі” 5 чэрвеня далучыліся практычна ўсе міністэрствы і ведамствы, а таксама іх падначаленыя арганізацыі. На ўборку тэрыторый выйдуць школы, тэатры, у тым ліку Вялікі тэатр оперы і балета, музеі, у тым ліку Нацыянальны мастацкі музей, вайсковыя часці, буйныя прамысловыя прадпрыемствы. Аб падтрымцы акцыі  паведамілі Міністэрства лясной гаспадаркі, Міністэрства па надзвычайных сітуацыях, Міністэрства гандлю, Міністэрства культуры, Міністэрства юстыцыі, Дзяржаўны пагранічны камітэт, Дзяржаўны мытны камітэт і многія іншыя.

У гэты дзень работнікі ведамстваў, арганізацый і прадпрыемстваў выйдуць на ўборку тэрыторый. Але ў першую чаргу, улічваючы, што 5 чэрвеня пачатак летняга сезона, увагу  ўдзельнікі акцыі будуць надаваць месцам масавага адпачынку — паркам, пляжам, прыбярэжным тэрыторыям вадаёмаў.

Акрамя гэтага, да акцыі розныя ўстановы прымеркавалі іншыя мерапрыемствы, напрыклад, конкурсы экалагічнага малюнка, плаката, і нават збор макулатуры.

Аналагічныя мерапрыемствы “Саюзнай уборкі” пройдуць у Расіі і Казахстане.