Наш раённы Дом рамёстваў — лепшы ў краіне

У Мінску прайшоў шосты Рэспубліканскі фестываль-кірмаш рамёстваў “Вясновы букет”. Ён праводзіцца з мэтай падтрымкі і папулярызацыі традыцыйных і часам забытых рамёстваў. Каля 400 майстроў з усіх куткоў краіны прадэманстравалі мінчанам і гасцям сталіцы сваю народную творчасць. Гэта разьба, ганчарная і кавальская справы, ткацтва, вышыўка, бісерапляценне, роспіс, пляценне з прыродных матэрыялаў і многае іншае. У фестывалі-кірмашы ўдзельнічалі і прадстаўнікі Ганцавіцкага раёна. Дамоў яны прыехалі з перамогай — раённы Дом рамёстваў атрымаў Дыплом I ступені.

Па словах дырэктара Ганцавіцкага Дома рамёстваў Маргарыты Саланевіч, у склад нашай дэлегацыі ўваходзілі 17 чалавек. “На фестывалі мы паказалі ўсё, чым багаты наш раён, — дзеліцца Маргарыта. — Наша пляцоўка прываблівала гасцей свята, мы частавалі іх мёдам, спявалі песні, ігралі на музычных інструментах. Работы нашых майстроў вельмі цікавілі наведальнікаў, гэта і не дзіўна, бо ад нас ездзілі таленавітыя людзі: народныя майстры Беларусі Ніна Казак і Ульяна Віннік, майстар, ткачыха Наталля Рабцэвіч, Марыя Муха, яна цудоўна вышывае і пляце паясы, Валянціна Занька займаецца саломкапляценнем, Сяргей Зялёнка выконвае разьбу па дрэве. Акрамя дарослых і вопытных майстроў у сталіцу ездзілі і маленькія ўдзельнікі гуртка “Ткацтва” — Аляксандра Рабцэвіч і Мілена Дрозд.

Таксама разам з намі былі і ўдзельнікі клуба народнай творчасці “Багач”. Народныя песні выканаўцаў з Борак нікога не пакінулі раўнадушнымі.

Работы Галіны Пупач, Яўгеніі Станкевіч, Віталія Шапялевіча, якія не змаглі ў той дзень прысутнічаць на фестывалі-кірмашы, мы таксама выстаўлялі”.

Трэба адзначыць, што на “Вясновым букеце” разам з работамі народных майстроў былі выстаўлены і фотаздымкі новага праекта, арганізаванага Маргарытай Саланевіч, які высока ацанілі члены журы.

“Мы фатаграфавалі старыя, закінутыя хаты, той беспарадак у іх і каля іх, — расказала яна, — каб яшчэ раз нагадаць людзям, што сваю гісторыю, продкаў неабходна памятаць і клапаціцца аб тым, каб моладзь таксама іх не забывала”.

Аксана МІНІНА. Фота з архіва Ганцавіцкага раённага Дома рамёстваў.