Ім па сіле любая работа

Адзначылі сваё прафесійнае свята меліяратары. Людзі гэтай прафесіі здаўна лічацца надзейнымі партнёрамі работнікаў аграпрамысловага комплексу. Дзякуючы іх руплівай працы, падтрымліваецца аптымальны водна-паветраны рэжым, а меліярацыйныя сістэмы і збудаванні прыносяць неацэнную карысць сельскай гаспадарцы.

Няпростая гэта работа — не дапускаць зніжэння прадукцыйнасці кожнага гектара меліяраваных земляў, асабліва тых, якія былі здадзены ў эксплуатацыю дзясяткі гадоў таму назад. Але рупліваму дружнаму калектыву Ганцавіцкага ПМС яна па сіле. За гады паўвекавога існавання арганізацыі тут набыты каштоўны вопыт вытворчай дзейнасці, які не губляецца з часам, а наадварот, удасканальваецца. І нават у самыя няпростыя часіны ў калектыве захаваўся асноўны касцяк рабочых, якія любяць сваю прафесію, не здраджваюць ёй.

Зараз у ПМС працуюць 93 чалавекі. Гэта крыху менш, чым летась, бо маладыя спецыялісты, якія ўліліся ў калектыў нядаўна, пайшлі служыць у армію. У арганізацыі спадзяюцца, што яны вернуцца на прадпрыемства. Ну, а ў жніўні тут прымуць новых выпускнікоў нашага прафліцэя, з якім пастаянна падтрымліваюцца надзейныя партнёрскія сувязі.

Як я ўжо адзначала, у ПМС працуе нямала вопытных меліяратараў, якія не баяцца работы і, будзем спадзявацца, часовых цяжкасцей і пра якіх з асаблівай цеплынёй згадваў кіраўнік арганізацыі Аляксандр Шут і спецыялісты вытворча-тэхнічнага аддзела. Сярод іх машыністы экскаватара Канстанцін Сайка, Васіль Голуб, машыніст крана Юрый Наумік (на здымку), дыспетчар Святлана Муха, трактарысты Міхаіл Завадскі і Мікалай Каско, машыніст бульдозера Уладзімір Цупрык. Гэта ў іх вучацца працаваць адказна, сумленна, па-гаспадарску берагчы давераную тэхніку маладыя спецыялісты. Нядаўна працуюць у сістэме меліярацыі машыніст экскаватара Ігар Ярашэвіч, а таксама машыніст бульдозера Яўген Буракоўскі, але па тым, як ахвотна яны імкнуцца пераняць майстэрства сваіх старэйшых калег і як працуюць, і выконваюць даведзеныя заданні, можна смела сцвярджаць: у славутых меліяратараў Ганцаўшчыны ёсць прадаўжальнікі добрых спраў. І, нягледзячы на тое, што гэты год выдаецца для калектыву няпростым — змяншаецца амаль напалову фінансаванне — даведзеныя аб’ёмы работ яны выконваюць паспяхова.

Так, за прайшоўшыя пяць месяцаў гэтага года калектыў ПМС выканаў аб’ём работ на суму 9719 мільёнаў рублёў. Працуюць меліяратары сёлета на некалькіх аб’ектах. У чэрвені імі будзе здадзены ў эксплуатацыю аб’ект “Меліярацыйная сістэма “Чудзін” ААТ “Райаграсэрвіс”, вялікі аб’ём работ выкананы сёлета на рыбгасе “Лактышы” — на суму 1669 мільёнаў рублёў; на такую ж суму выкананы работы і на аб’екце “Чудзін” СВК “Крышылавічы”, дзе здадзены ў эксплуатацыю землі на плошчы 254 гектары.

Нядаўна  меліяратары пачалі новы аб’ект “Боркі”, на якім у маі асвоена 125 мільёнаў рублёў. У другім квартале гэтага года калектыў чакае яшчэ адзін новы аб’ект — у СВК “Раздзялавічы”, дзе плануецца правесці рэканструкцыю зямель на плошчы 260 гектараў. Намечанае меліяратары выканаюць з лёгкасцю, бо, як ужо адзначалася, калектыў гэты працаздольны, мае добры парк патрэбнай тэхнікі, якую ўмеюць шанаваць і даглядаць іх гаспадары. Дарэчы, кожны год ён папаўняецца. Вось і сёлета прадпрыемства набыло за кошт уласных сродкаў экскаватар карэйскай вытворчасці “Хундай”, прадукцыйнасць якога даволі высокая. Галоўнае, каб была работа руплівым рукам меліяратараў, а яны — не падвядуць.

Марыя ДЗЁМІНА.