Псіхалагічная падрыхтоўка

Завяршаецца навучальны год. Наперадзе — лета. Многія бацькі з хваляваннем чакаюць яго, бо лета — гэта не толькі час для аздараўлення дзяцей, але і пара выпускных экзаменаў і ўступнай кампаніі. Дарослыя і самі выпускнікі хвалююцца, перажываюць і ў выніку атрымліваюць стрэсы, якія адмоўна ўплываюць на здароўе.

Аказваецца, пазбегнуць стрэсавых сітуацый можна. Як гэта зрабіць, раіць педагог-псіхолаг ДУА “Сацыяльна-педагагічны цэнтр Ганцавіцкага раёна” Наталля ЛЕМЯШЭЎСКАЯ.

Слова “экзамен” у перакладзе з латыні азначае “выпрабаванне”. Дзеці ў большасці сваёй так і адносяцца да яго — як да вельмі сур’ёзнага жыццёвага выпрабавання: з павышаным пачуццём адказнасці. Але нават калі ваша дзіця заўсёды было самастойным у пытаннях вучобы (а калі несамастойным — тым больш!), кантраляваць яго падрыхтоўку да экзаменаў усё роўна прыйдзецца.

Заўсёды будзьце гатовы прапанаваць сваю дапамогу. Прысвячайце вашаму дзіцяці як мага больш часу. Нават калі вы, напрыклад, далёкія ад такіх прадметаў, як, скажам, хімія ці фізіка, усё ж набярыцеся цярпення і выслухайце да канца расказ аб кіслародзе або біноме Ньютана. З аднаго боку, гэта будзе своеасаблівай рэпетыцыяй перад экзаменам, а з другога, што не менш важна, — дзіця адчуе, што яго экзамены гэтак жа важныя для вас, як і для яго.

Калі пачынаецца пара экзаменаў, вашы дачка ці сын павінны ведаць, што бацькі застануцца яго сябрамі, якім бы не быў вынік іспытаў — здадзены экзамен на “выдатна” ці ён правалены. Калі ж адзнака сапраўды акажацца дрэннай, не рабіце з гэтага трагедыі. Ніякі экзамен не можа і не павінен “дыскваліфікаваць” дзіця ў вашых вачах. У такі момант яму больш за ўсё патрэбны ваша любоў і разуменне. Калі вы ў такі час адмяжуецеся ад яго, не працягнеце яму руку падтрымкі, можаце страціць давер дзіцяці беспаваротна.

Не папракайце дзіця грашыма, заплачанымі рэпетытару. Гэта можа выклікаць пачуццё віны, а значыць, і яшчэ адзін стрэс. Не абяцайце за добра здадзеныя экзамены залатыя горы. Мала таго, што дзіця будзе думаць у час падрыхтоўкі да экзаменаў больш аб узнагароджанні, чым аб іх, дык яшчэ і на самім экзамене не зможа сканцэнтравацца.

Аб стрэсе ў выпадку няўдачы можна і не гаварыць. Перад экзаменамі не шкодзіць зазірнуць у паліклініку, тым больш калі ў вашага дзіцяці ёсць хранічнае захворванне. У стрэсавай сітуацыі яно можа абвастрыцца і прывесці да сур’ёзных вынікаў. Улічыце парады ўрача. Магчыма, напярэдадні экзаменаў спатрэбіцца прайсці прафілактычнае лячэнне. Не адмаўляйцеся, калі ўрач, улічваючы стан дзіцяці, параіць вам вызваліць яго ад экзаменаў. Дарэчы, у любой паліклініцы і ў дырэктара школы ёсць інструкцыя са спісам захворванняў, пры якіх урач проста абавязаны вызваліць ваша дзіця ад экзаменаў, тым больш што атэстат яму павінны выдаць у любым выпадку, а на медаль ваш сын ці дачка не прэтэндуюць.

Памятайце: здароўе вашага дзіцяці важней, чым адзнака. Мабыць, і ў вашым доме ці кватэры ў гэтую пару павінна быць камфортней, цішэй і спакайней, чым звычайна. Атмасфера ў сям’і ўвогуле многага варта, а ў пару экзаменаў — тым больш. Пазбягайце канфліктаў і знімайце напружанне. Навучыце дзяцей верыць у свае сілы, верыць у тое, што ім абавязкова пашанцуе. І не толькі на экзамене!