У ГОНАР СВЯЦІЦЕЛЯ МІКАЛАЯ

А мінулым тыдні праваслаўныя хрысціяне ўшаноўвалі памяць Свяціцеля Мікалая Цудатворца. Імем гэтага святога названы шматлікія храмы Беларусі, у тым ліку і ў Малькавічах. Будаўніцтва царквы ў імя Свяціцеля Мікалая Цудатворца, якая лічыцца творам народнага дойлідства, пачалося ў нашай вёсцы ў 1991 годзе, а 17 верасня 1992 года яна была асвечана і тут прайшла першая служба. Драўляны будынак царквы ў пачатку 21 стагоддзя быў абкладзены цэглай.

Вялікая роля ў адраджэнні Свята-Мікалаеўскай праваслаўнай царквы ў Малькавічах належыць настаяцелю храма протаіерэю Вячаславу Цэвану. У храме пастаянна вядзецца Богаслужэнне. Асабліва шматлюдна было тут у чацвер, 22 мая, у дзень Свяціцеля Мікалая, чыё імя і носіць царква. На святочнае богаслужэнне быў запрошаны Высокапрэасвяшчэннейшы Архіепіскап Пінскі і Лунінецкі Стэфан, Благачынны цэркваў Ганцавіцкай акругі, настаяцель храма Свяціцеля Ціхана протаіерэй Пётр Піліпчук, свяшчэннікі Ганцаўшчыны, кіраўніцтва раёна. Хлебам-соллю на вышытым ручніку, букетамі белых руж, цёплымі словамі сустракалі прыхаджане Высокапрэасвяшчэннейшага Архіепіскапа Пінскага і Лунінецкага Стэфана (НА ЗДЫМКУ) і запрошаных на свята гасцей. 

Старшыня раённага выканаўчага камітэта Аляксандр Саланевіч прывітаў усіх, павіншаваў са святам і абмяняўся з настаяцелем храма айцом Вячаславам іконамі. Да прыхаджан звярнуўся з прывітальнымі словамі Высокапрэасвяшчэннейшы Стэфан, якому айцец Вячаслаў з пашанай паднёс у падарунак ікону Мікалая Цудатворца.

Затым у храме пачалося святочнае Богаслужэнне, якое вёў Архіепіскап Пінскі і Лунінецкі Стэфан, а таксама протаіерэй Пётр Піліпчук і ўсе свяшчэннікі раёна. На тварах прыхаджан у гэты час свяцілася ўрачыстая радасць, сэрцы напаўняліся асаблівай узнёсласцю.

Людміла СЕНЮКОВІЧ,

прыхаджанка храма Свяціцеля

Мікалая Цудатворца

в. Малькавічы.

Фота Аксаны МІНІНАЙ.