Першая сесія

На выбарах дэпутатаў у раённы Савет дэпутатаў 27 склікання, якія прайшлі 23 сакавіка, жыхары Ганцаўшчыны пры вельмі высокай яўцы ў 91,3 працэнта абралі 27 сваіх прадстаўнікоў. Прычым, у 8 акругах выбары праходзілі на альтэрнатыўнай аснове. І вось на гэтым тыдні, 17 красавіка, прайшла першая сесія раённага Савета дэпутатаў, на якой вырашаліся арганізацыйныя пытанні.

Найперш, адбыліся выбары старшыні. Шэраг дэпутатаў выказаліся за кандыдатуру Віктара Дразда дэпутата па Чыгуначнай выбарчай акрузе № 22, які ўзначальваў райсавет дэпутатаў 26 склікання. Тайным галасаваннем ён і быў абраны. За яго аднагалосна прагаласавалі ўсе 25 дэпутатаў, якія прынялі ўдзел у сесіі. Абраны і намеснік старшыні раённага Савета дэпутатаў: ім стаў Вячаслаў Кіпцэвіч — дэпутат па Спартыўнай выбарчай акрузе № 4. Таксама абраны прэзідыум раённага Савета дэпутатаў.

Разам з гэтым зацверджаны рэгламент Ганцавіцкага раённага Савета дэпутатаў і план работы на 2014 год. Утвораны чатыры пастаянныя камісіі: па пытаннях законнасці і правапарадку, дэпутацкай этыцы (старшыня Аляксей Крысюк, дэпутат па Кастрычніцкай выбарчай акрузе № 1), па пытаннях бюджэту і сацыяльна-эканамічнага развіцця (старшыня Наталля Сідоранка, дэпутат па Вялікакруговіцкай выбарчай акрузе № 17), па аграрных пытаннях і экалогіі (старшыня Уладзімір Бялоў, дэпутат па Малькавікай выбарчай акрузе № 23), па пытаннях сацыяльна-культурнай сферы і сацыяльнай абароны насельніцтва (старшыня Вадзім Сашко, дэпутат па Залінейнай выбарчай акрузе № 11).

Кіраўнік раёна Аляксандр Саланевіч, які прыняў удзел у рабоце сесіі, павіншаваў усіх з абраннем у дэпутаты і пажадаў плённай працы. У сваю чаргу, Віктар Дрозд адзначыў, што людзі выказалі давер і яго трэба апраўдаць. Дэпутаты — сувязнае звяно паміж выканаўчай уладай і насельніцтвам. З людзьмі неабходна працаваць і адстойваць іх інтарэсы.

Аляксей ГРУШЭВІЧ.