Разам — на агульны вынік

Больш за 3 мільёны чалавек выйшлі ў краіне на рэспубліканскі суботнік, які прайшоў 12 красавіка. Сабраныя грошы пойдуць на добрую справу — будаўніцтва рэспубліканскага цэнтра пазітронна-эмісійнай тамаграфіі — асобнага паўнавартаснага цэнтра дакладнай дыягностыкі, які запатрабаваны ў такіх медыцынскіх галінах як анкалогія, кардыялогія, неўралогія і нейрахірургія.

Жыхары нашага раёна не засталіся староннімі назіральнікамі — таксама прынялі ўдзел у агульнай справе. Звыш 10500 чалавек шчыравалі ў гэты дзень на разнастайных аб’ектах раёна і сваіх рабочых месцах.

Работнікі ўстаноў аховы здароўя разам з камунальнікамі працягвалі абуладкоўваць зону адпачынку на пляжы “Паўднёвы”, супрацоўнікі РАНС прыводзілі ў парадак тэрыторыю каля кафэ “Адпачынак” у райцэнтры. Ва ўрочышчы Горкі шчыравалі работнікі культуры і адукацыі. Шмат зроблена па навядзенні парадку на зямлі і калектывамі такіх арганізацый, як “Ганцавічырайгаз”, лясгас, раён электрасетак, якія працавалі на высечцы кустоўяў.

На пасадку лесу ў Круговіцкім лясніцтве выехалі і супрацоўнікі аддзелаў і ўпраўленняў райвыканкама на чале з кіраўніком раёна Аляксандрам Саланевічам. Да гэтай патрэбнай справы далучыліся супрацоўнікі архбюро і рэдакцыі “Савецкага Палесся”. Здаецца, аб’ём работы быў даволі вялікі, але калі разам ўзяцца за справу, яна ладзіцца лёгка і хутка. І за паўдня ў лясніцтве з’явілася новая плантацыя сасны.

Дарэчы, шматлюдна было і ў Вялікіх Круговічах. Тут з падачы старасты вёскі Ванды Чабатарэнка з месяц ужо вядзецца добраўпарадкаванне тэрыторыі ля царквы. Дзякуючы кіраўніцтву прадпрыемства меліярацыйных сістэм, выкананы вялікі аб’ём работ па ачыстцы рэчкі і абуладкаванню невялічкага парка. Работнікі ПМС таксама расчысцілі пляцоўку для стаянкі аўтамашын каля царквы і насыпалі дарогу, што цягнецца да шматвекавога дуба. Намаганні па добраўпарадкаванню гэтага цудоўнага месца прыклалі настаўнікі і вучні мясцовай школы, іншых устаноў і арганізацый. І хаця яшчэ   работы наперадзе хапае, але ўжо бачны вынікі, і ў завяршэнні пачатага можна не сумнявацца. Частка старадаўняга паркавага ансамбля набудзе новы выгляд і стане выдатным месцам для адпачынку. Плануецца таксама поўнасцю ачысціць і абуладкаваць сажалку і зрабіць тут пляжную зону, як гэта гадоў 40 назад і было.

Па статыстычных дадзеных, жыхары Ганцаўшчыны на рэспубліканскім суботніку зарабілі 148 мільёнаў 445 тысяч рублёў, якія і будуць пералічаны на будаўніцтва рэспубліканскага дыягнастычнага цэнтра. А таксама шмат зрабілі па добраўпарадкаванні нашага мілага сэрцу куточка Радзімы — Ганцаўшчыны.

Аляксей ГРУШЭВІЧ.