Званы — у дарунак

Светлая падзея адбылася ў мінулую нядзелю ў Малькавічах. У царкве свяціцеля Мікалая Цудатворцы прайшло асвячэнне васьмі званоў, якія набылі за ўласныя сродкі ў дарунак сваёй маленькай радзіме Анатолій Масалевіч і яго жонка Святлана.

Сям’я жыве зараз у Расіі, але карані Анатолія Міхайлавіча і Святланы Фёдараўны тут, у іх родных і любых Малькавічах. Яны наведваюцца ў сваю вёску, падтрымліваюць блізкіх, прыкмячаюць змены, якія адбываюцца ў Малькавічах, радуюцца добрым весткам. У вёсцы  не так даўно пабудавана царква свяціцеля Мікалая Цудатворцы. І сям’я Масалевіч вырашыла паднесці ў дарунак ёй і прыхаджанам восем званоў. Яны былі адліты ў Варонежы і на мінулым тыдні дастаўлены ў Малькавічы. На іх ёсць і  гравіроўка: “Званы адліты ў Варонежы за кошт сродкаў ахвяраванняў сям’і Масалевіч”. Адзін са званоў важыць 132 кілаграмы.

Шмат людзей сабралася на асвячэнне званоў. Яны былі замацаваны на спецыяльных апорах, ва ўстаноўцы якіх аказаў вялікую дапамогу дырэктар прыватнага ўнітарнага вытворча-гандлёвага прадпрыемства “АверсЛес” Вадзім Агалец, і па-святочнаму ўпрыгожаны.

 Пасля малебену ў гонар асвячэння званоў прыхаджане папрасілі айца Вячаслава пазваніць, каб пачуць іх перазвон. Беражліва, з глыбокай пашанай ён падышоў да званоў. І па ваколіцах вёскі паплылі меладычныя, кранаючыя душу гукі. Многія не маглі стрымаць шчырых слёз радасці, замілавання. І ўдзячнасці сваім землякам за неацэнны дарунак.

Пакуль званы будуць змешчаны ўнутры царквы, а потым зоймуць сваё месца на званіцы. Цяпер задача знайсці званара, які б мог на святы і ў іншыя важныя дні званіць ва ўсе дзевяць званоў (адзін быў у царкве да гэтага). А пакуль згадзіўся паспрабаваць рабіць гэта вучань Малькавіцкай сярэдняй школы Максім Сенюковіч. Па меркаванні бацюшкі і тых, хто пачуў ужо гукі падораных царкве званоў, іх перазвоны  чыстыя, меладычныя, радасныя. І хай яны склікаюць людзей на светлыя падзеі і ўрачыстасці. А тыя, хто будзе слухаць іх мелодыю, няхай добрым словам згадае міласэрную сям’ю, якая паднесла такі каштоўны дарунак сваёй роднай старонцы.

Ніна БУЙКЕВІЧ, старшыня Малькавіцкага сельвыканкама.