Самыя недысцыплінаваныя плацельшчыкі — арганізацыі АПК

Пытанні заработнай платы і адлічэнняў узносаў у Фонд сацыяльнай абароны насельніцтва пастаянна знаходзяцца ў цэнтры ўвагі кантралюючых органаў. Па фактах выяўленых парушэнняў заканадаўства аб працы толькі за 2 месяцы з пачатку года Камітэтам дзяржкантролю Брэсцкай вобласці прыцягнута да адміністрацыйнай адказнасці 16 службовых і 16 юрыдычных асоб, якія аштрафаваны на 30,6 мільёна рублёў. Для параўнання, за ўвесь мінулы год — 44 службовыя і 44 юрыдычныя асобы, з якіх спагнана 77,4 мільёна рублёў.

У апошні час, калі пачасціліся выпадкі непрытрымлівання тэрмінаў выплаты зарплаты, невыканання плацельшчыкамі абавязацельстваў па адлічэннях на дзяржаўнае сацыяльнае страхаванне, да такіх фактаў адносіны сталі больш строгімі. Гэты накірунак работы арганізацый Брэстчыны і стаў тэмай калегіі абласнога Камітэта дзяржкантролю.

Спецыялістамі КДК вывучана сітуацыя з выплатай заработнай платы ў рэгіёне за дастаткова працяглы тэрмін. 34 арганізацыі Брэстчыны не выплацілі поўнасцю, альбо часткова, зарплату 6238 работнікам, якім завінаваціліся амаль 18 мільярдаў рублёў. Пры гэтым 31 з усіх даўжнікоў — арганізацыі аграпрамысловага комплексу. Па патрабаванню КДК прыняты меры. Асноўная частка запазычанасці па зарплаце ліквідавана, вінаватыя службовыя асобы пакараны. У выніку на 1 студзеня 2014 года, па дадзеных статыстыкі, у вобласці была толькі адна арганізацыя-даўжнік. 

Аднак праведзеныя ў студзені — лютым праверкі паказалі, што статыстычная справаздачнасць не заўсёды адлюстроўвае рэальны малюнак выплаты зарплат. Так, непрадастаўленне альбо прадастаўленне недакладных дадзеных аб пратэрмінаванай запазычанасці па зарплаце ў органы статыстыкі выяўлена на ўсіх 9 правераных сельгаспрадпрыемствах Кобрынскага раёна. Матэрыялы гэтых праверак накіраваны для прававой ацэнкі дзеянняў службовых асоб сельгаспрадпрыемстваў у праваахоўныя органы.

Выклікае заклапочанасць і сітуацыя з пералічэннем плацяжоў у Фонд сацабароны. За мінулы год пратэрмінаваная запазычанасць па пералічэннях у Фонд павялічылася ў 10 разоў, колькасць прадпрыемстваў, якія маюць запазычанасць па такіх плацяжах, вырасла з 39 да 144. Максімальныя сумы пратэрмінаванай запазычанасці прыпадаюць на прадпрыемствы Маскоўскага і Ленінскага раёнаў Брэста, а таксама Ляхавіцкага, Івацэвіцкага, Кобрынскага і Лунінецкага раёнаў.

Разгледзеўшы матэрыялы кантрольна-аналітычных мерапрыемстваў, калегія кдк Брэсцкай вобласці прапанавала мясцовым выканаўчым і распарадчым органам прыняць дзейсныя меры па выключэнню выпадкаў несвоечасовай выплаты заработнай платы, па мінімізацыі запазычанасці ў Фонд сацабароны, змяншэнню стратных арганізацый і скарачэнню дапушчаных страт.

Камітэт дзяржкантролю Брэсцкай

вобласці.