Парковачнае месца

У мінулыя выхадныя адбыўся даволі неардынарны выпадак у адным з двароў райцэнтра па вуліцы Заводскай. У міліцыю патэлефанавала жанчына і паведаміла, што ў двары дома дзеці мячом пашкодзілі яе аўтамабіль. Знайсці вінаватых вартавым правапарадку не складала цяжкасцей, але высветлілася іншая акалічнасць. Аказалася, што пашкоджаны аўтамабіль стаяў у неналежным месцы — практычна на самой гульнявой пляцоўцы, дзе бавілі час дзеці.

Стаянка аўтамабіляў у забароненых месцах у нашым райцэнтры — справа звычайная. Як пракаменціраваў сітуацыю начальнік аддзялення ДАІ РАУС Вячаслаў Гуліцкі, у мэтах навядзення належнага парадку ў пытаннях правільнай стаянкі транспартных сродкаў на дваровых тэрыторыях і паблізу пад’ездаў жылых дамоў праводзіліся абследаванні. Па іх выніках старшыням шэрагу жыллёва-будаўнічых спажывецкіх кааператываў і дырэктару жыллёва-камунальнай гаспадаркі накіраваны прадпісанні аб абсталяванні знакамі стаянак і месц, дзе пакідаць машыны забаронена, а таксама праведзены прафілактычныя мерапрыемствы па недапушчэнню правапарушэнняў, звязаных з няправільнай паркоўкай. Але, як паказвае практыка, некаторыя аўтаўладальнікі ўсё роўна застаюцца недысцыплінаванымі і толькі накладанне штрафаў рэальна становіцца дзейснай мерай у гэтай справе.

Ёсць і іншы бок пытання. Большасць дамоў будавалася даўно, і тады аб стаянках і паркоўках ніхто не думаў. У савецкіх людзей проста не было столькі аўтамабіляў. Цяпер жа ў іншых дварах вечарам даводзіцца “праціскацца” на сваім аўтамабілі сярод машын. Зразумела, кожны жадае паставіць уласны транспартны сродак пад сваімі вокнамі — бачна і спакайней на душы. Хаця ў многіх ёсць і гаражы, але ж гэта нязручна. Усё ж такі добра, калі машына пад бокам.

Вырашэннем пытання стаянак у райцэнтры займаецца аддзел жыллёва-камунальнай гаспадаркі райвыканкама сумесна з камунгасам. “Падчас сходаў па месцы жыхарства многія ўзнімалі гэтае пытанне, — адзначыў начальнік аддзела ЖКГ Валерый Русакевіч. — Нагадаю толькі, што работа ў гэтым накірунку вядзецца і сёлета. У мікрараёне Будаўнікоў будзе абуладкавана шэраг пляцовак для стаянкі аўтамабіляў, але заўважу, што ў многіх выпадках аўтаўладальнікі проста лянуюцца. Стаянкі немагчыма зрабіць у кожным двары, яны проста павінны быць у крокавай даступнасці”.

Аляксей ГРУШЭВІЧ.