Справа кожнага

Да суботнікаў можна ставіцца па-рознаму. Адны з ахвотай выходзяць на іх, але знаходзяцца і такія, што лічаць іх перажыткам мінулага. Ва ўсялякім выпадку аб гэтым можна меркаваць хаця б па тым, як наводзіцца парадак  на тэрыторыях шматкватэрных дамоў у райцэнтры. Камунгас бясплата выдзяляе транспарт для вывазу смецця і многія ўжо скарысталі гэтую магчымасць, каб навесці парадак каля свайго дома і пад’езда. Зразумела, што той, хто сам наводзіць чысціню, ніколі не будзе смеціць. І чыстыя, дагледжаныя двары характарызуюць іх жыхароў лепш любых выказванняў.

Гэта ж можна сказаць пра горад і любы населены пункт раёна ў цэлым. Немагчыма толькі ківаць на камунальнікаў — маўляў, іх справа прыбіраць. Як кажуць, чыста не там, дзе прыбіраюць, а там дзе не смецяць. А значыць гэтая справа агульная.

У мінулую суботу работнікі прадпрыемстваў, арганізацый і ўстаноў Ганцаўшчыны выйшлі на раённы суботнік, да іх далучылася і моладзь з навучальных устаноў. Спатрэбілася зусім нямнога часу, каб навесці парадак на адведзеных тэрыторыях вакол сваіх арганізацый. У горадзе таксама вычысцілі частку вуліц, а камунальнікі шчыравалі на ўборцы ляснога масіву па вуліцы Будаўнікоў і зоны адпачынку пляжу “Паўднёвы”. Частка гараджан дапамагала вяскоўцам: агароджвалі тэрыторыі ферм сельгаскааператываў “Любашава” і “Крышылавічы”. У апошняй гаспадарцы шчыравалі і супрацоўнікі райаддзела па надзвычайных сітуацыях на разборцы старых будынкаў. У Востраве гараджане наводзілі парадак каля нежылых домікаў СВК у цэнтры вёскі, а ў Вялікіх Круговічах выдатна папрацавалі на добраўпарадкаванні вёскі работнікі ПМС.

Здаецца, затрачана няшмат часу, а зроблена даволі многа і кожны, хто выйшаў на суботнік, уключыўся ў агульную справу, ужо можа лічыць сябе гаспадаром у сваёй вёсцы і горадзе, бо ён адчувае за іх адказнасць.

Аляксей ГРУШЭВІЧ. Фота аўтара.