Дык дзе ж знайсці канцы?

Восенню мінулага года ў нашым райцэнтры быў здадзены ў эксплуатацыю  жылы дом ЖБСК-37. У пяціпавярховым будынку, прызначаным для шматдзетных сем’яў, атрымалі кватэры сорак навасёлаў. Светлая, радасная падзея, у тым ліку і для нашай сям’і, у якой гадуецца шасцёра дзяцей. Але з прыходам першага ацяпляльнага сезона яна была азмрочана непаладкамі ў ацяпленні: у двухпакаёвых кватэрах №№ 1, 5, 9, 13, 17, размешчаных у левым крыле першага пад’езда нашага дома, не ўсе пакоі ацяпляліся:  адны былі цёплымі, другія — зусім халоднымі. Найбольш адчувальнай аказалася  праблема з ацяпленнем у кватэрах №№ 5, 9, 13. У іншых жа кватэрах дома было надзвычай цёпла.

Пра гэтую праблему з першага яе дня ведаў старшыня нашага кааператыва Анатолій Жалезны. Ён паспрабаваў дабавіць ціск, каб батарэі хоць крыху пацяплелі, але гэта не дало станоўчага выніку: у  маёй кватэры яны па-ранейшаму былі халоднымі ў спальні і ў кухні, затое ў падсобным памяшканні да іх нельга было дакрануцца. Лічыльнік “намотваў” немалую суму, якую я спраўна плаціў.

 І старшыня кааператыва,  і я бадай з восені звярталіся з гэтай праблемай у розныя раённыя службы. У ПМК-14, якая будавала дом, сказалі, што дом узведзены згодна з праектам і да іх прэтэнзій не можа быць. У камунгасе паведамілі, што гэта не іх праблема, параілі звяртацца да тых, хто будаваў дом, хаця грошы, якія мы плацім за ацяпленне, ідуць на іх рахунак. На той час намеснік старшыні райвыканкама Уладзімір Давыдчык паабяцаў разабрацца, але і  на сённяшні дзень праблема застаецца нявырашанай. Да яе дабавілася на днях і яшчэ адна: пачаліся перабоі з гарачай вадой. А іх трэба вырашаць абавязкова цяпер, бо гэты ацяпляльны сезон хутка закончыцца, і дзе гарантыя таго, што хвалюючая нас праблема не ўзнікне з прыходам новага сезона. І хто ведае, якой будзе наступная зіма. Калі не такая лагодная, як сёлетняя, то чаго чакаць тады? Спадзяёмся, што да маёй просьбы прыслухаюцца адказныя асобы і нашы кватэры будуць ацяпляцца так, як належыць.

Уладзімір Рылка,

 бацька шасці непаўналетніх дзяцей.