Жыхар райцэнтра спакусіў малалетнюю

На мінулым тыдні Ганцавіцкі РАСК узбудзіў крымінальную справу па арт. 168 КК Рэспублікі Беларусь у адносінах да жыхара райцэнтра Р., 1979 года нараджэння, які ў перыяд часу з 12 лістапада па 24 студзеня неаднаразова ўступаў у палавыя зносіны з непаўналетняй, якой не споўнілася і 14 гадоў.

Згодна з артыкулам 168 КК Рэспублікі Беларусь, палавыя зносіны, педэрастыя, лесбіянства або іншыя дзеянні сексуальнага характару, учыненыя асобай, якая дасягнула васямнаццацiгадовага ўзросту, з асобай, якая загадзя не дасягнула шаснаццацігадовага ўзросту, пры адсутнасці прыкмет злачынстваў, прадугледжаных артыкуламі 166 і 167, караюцца абмежаваннем волі на тэрмін ад двух да чатырох гадоў або пазбаўленнем волі на тэрмін ад двух да пяці гадоў.

На дадзены момант Р. знаходзіцца пад арыштам за здзейсненае злачынства ў Ляхавіцкім раёне.

МІЛІЦЫЯ

Скандаліў

у райбальніцы

У мінулы панядзелак у ганцаўчаніна С. альбо быў вельмі дрэнны настрой і яму хацелася з кім-небудзь пасварыцца, альбо яму нечым не спадабалася праца медыкаў. Таму раніцай ён рушыў у кабінет эндакрынолага. Медсястра, якой, мабыць, надакучыла назіраць за скандальнымі дзеяннямі мужчыны, выклікала міліцыянераў і паскардзілася на тое, што спадар С. перашкаджаў працаваць і выкарыстоўваў нецэнзурную лексіку. Праверку па гэтай справе праводзіць РАУС.

У жанчыны

з халадзільніка

ўкралі сала

Жыхарка адной з вёсак нашага раёна не адразу выявіла прапажу сала ў халадзільніку. 12 сакавіка яна паведаміла супрацоўнікам міліцыі, што 10 сакавіка, у перыяд часу з 9.00 да 13.00, нехта ўкраў у яе 4 кг сала.

Ехаў на возе

і пашкодзіў веласіпед

У мінулую сераду ў РАУС паступіла паведамленне жыхаркі райцэнтра М. Яна расказала міліцыянерам, што жыхар вёскі Ганцавічы, кіруючы возам у нецвярозым стане, пераехаў веласіпед яе сына і пашкодзіў яго. Праверку праводзіць РАУС.

Суседскія сваркі

Адна з жыхарак вёскі Люсіна паскардзілася ў міліцыю на сваіх суседзяў. Жанчына паведаміла аб тым, што яны абвінавачваюць яе дзяцей у крадзяжы дроў і менавіта па гэтай прычыне скандалілі з ёй. Хто вінаваты, разбярэцца міліцыя.

Неабыякавыя

яшчэ засталіся

Неабыякава да чужой маёмасці ставіцца жыхар райцэнтра Г. Мужчына, калі ўбачыў, што невядомыя грамадзяне грузяць у свой аўтамабіль уцяпляльнік з дома, які будуецца па вуліцы Арлоўскага, адразу ж паведаміў аб гэтым супрацоўнікам міліцыі. Па дадзенай справе праводзіцца праверка.

СВЯТЛАФОР ДАІ

За кіраванне транспартным сродкам у стане алкагольнага ап’янення затрыманы нідзе не працуючы ганцаўчанін Сяргей Аляксандравіч Амельяновіч, 1990 года нараджэння, які кіраваў аўтамашынай “БМВ-320”.