Будучае — за маладымі

Вось ужо дзясяты год 15 сакавіка, у Дзень Канстытуцыі Рэспублікі Беларусь, у нашай краіне праводзіцца Усебеларуская патрыятычная акцыя “Мы — грамадзяне Беларусі”. Прайшла яна ў мінулую суботу і ў нашым раёне. Урачыстае мерапрыемства з нагоды дзяржаўнага свята і гэтай падзеі праводзілася ў актавай зале ДУ “Сярэдняя школа № 3 г. Ганцавічы” і сабрала разам вучнёўскую моладзь Ганцаўшчыны, кіраўніцтва раёна, прадстаўнікоў дэпутацкага корпуса, грамадскасці, ветэранаў працы. У рамках яго  па добрай традыцыі адбылося ўручэнне пашпартоў маладым жыхарам раёна, а таксама маладзёжных білетаў ГА “БРСМ” і прайшоў прыём у рады Беларускай рэспубліканскай піянерскай арганізацыі.

Адкрыў урачыстую цырымонію старшыня раённага выканаўчага камітэта Аляксандр Саланевіч. Адзначаючы адметнасць знамянальнай даты, кіраўнік раёна падкрэсліў  велізарнае значэнне ў жыцці краіны і кожнага яе жыхара Асноўнага Закона, які стаў фундаментам развіцця дэмакратычнай Беларусі, гарантам правоў і свабод грамадзян, нагадаў, што Канстытуцыя Рэспублікі Беларусь служыць усяму народу і можа многае расказаць пра этапы станаўлення нашай дзяржавы. Аляксандр Паўлавіч прывёў звесткі з гісторыі стварэння першай Канстытуцыі ў свеце, расказаў пра адметнасць Канстытуцый у розных краінах планеты, чым вельмі зацікавіў слухачоў. Звяртаючыся да юнакоў і дзяўчат Ганцаўшчыны, якім выпаў гонар якраз у дзень дзяржаўнага свята атрымаць свой галоўны дакумент — пашпарт грамадзяніна Рэспублікі Беларусь, кіраўнік раёна пажадаў, каб гэтая падзея стала для іх самай яркай і запамінальнай, нагадаў, што цяперашняя моладзь — будучыня нашай краіны, і ад яе залежыць, у якой краіне мы будзем жыць праз некалькі дзясяткаў гадоў. Верыцца, што яна — у надзейных руках. Бо ў радах моладзі нашай краіны — неабыякавыя да яе і свайго лёсу юнакі і дзяўчаты, якія сваімі адносінамі да вучобы, грамадскага жыцця даюць права на такую ўпэўненасць, веру і надзею.  

Урачыста і велічна прагучаў гімн Рэспублікі Беларусь. Пачалася хвалюючая цырымонія ўручэння пашпартоў юным грамадзянам раёна. Для атрымання пашпарта грамадзяніна Рэспублікі Беларусь і падарункавага выдання “Я — грамадзянін Рэспублікі Беларусь” былі запрошаны самыя дастойныя прадстаўнікі маладога пакалення Ганцаўшчыны: пераможцы і прызёры прадметных алімпіяд, творчых конкурсаў, спартыўных спаборніцтваў, актыўныя ўдзельнікі грамадскага жыцця раёна. Гэтую ганаровую місію выканалі старшыня раённага выканаўчага камітэта Аляксандр Саланевіч і начальнік аддзялення па грамадзянстве і міграцыі аддзела ўнутраных спраў райвыканкама Рэгіна Манюк, старшыня раённага Савета дэпутатаў Віктар Дрозд і старшыня раённай ветэранскай арганізацыі Яўгенія Стацько. Віктар Якаўлевіч і Яўгенія Сяргееўна, віншуючы рабят, выказалі ўпэўненасць у тым, што яны будуць дастойнымі грамадзянамі нашай краіны і, захоўваючы слаўныя традыцыі старэйшых пакаленняў, зробяць усё для таго, каб яна развівалася і квітнела. Апладысментамі вітала зала ўсіх дзевятнаццаць юнакоў і дзяўчат, якія сёлета першымі  атрымалі свой галоўны дакумент.

Да гэтых цёплых віншаванняў далучыўся першы сакратар раённага камітэта грамадскага аб’яднання “БРСМ” Аляксандр Занька. “Наша краіна, — зазначыў ён, — маладая дэмакратычная прававая дзяржава. Яна мае патрэбу ў тым, каб маладыя людзі ўжо ў пачатку свайго жыццёвага шляху станавіліся сапраўднымі грамадзянамі, патрыётамі сваёй краіны. Быць патрыётам і паўнапраўным грамадзянінам — значыць, у першую чаргу, быць гаспадаром, стваральнікам у родным доме, на роднай зямлі, творча працаваць на карысць Айчыне”. Звяртаючыся да тых, хто атрымаў пашпарт грамадзяніна Рэспублікі Беларусь, Аляксандр Ануфрыевіч нагадаў і пра тую адказнасць, якую нясуць яны не толькі за ўласны лёс, але і за будучае сваёй дзяржавы. Ён жа адкрыў і цырымонію ўручэння маладзёжных білетаў новым членам БРСМ — актыўным, ініцыятыўным вучням раёна. Разам з начальнікам аддзела ідэалагічнай работы, культуры і па справах моладзі райвыканкама Алай Занька першы сакратар РК ГА “БРСМ” уручыў маладзёжныя білеты школьнікам Ганцаўшчыны.

У Беларускага рэспубліканскага саюза моладзі расце дастойная змена — юныя піянеры. І той святочны суботні дзень стаў знамянальным таксама для тых школьнікаў, якія ўступілі ў рады Беларускай рэспубліканскай піянерскай арганізацыі. У прыціхлай зале ўрачыста прагучалі словы піянерскай клятвы. І вось ужо на рабятах красуюцца гальштукі, якія павязалі ім старшыня раённай піянерскай арганізацыі Алена Мінько, начальнік аддзела адукацыі, спорту і турызму райвыканкама Надзея Здрок і першы сакратар РК ГА “БРСМ” Аляксандр Занька. “Няхай з піянерскіх крокаў пачынаецца ваш годны шлях у жыццё”, —  пажадала рабятам Алена Мінько.

У такой урачыстай, святочнай абстаноўцы прайшоў цудоўны канцэрт, падрыхтаваны юнымі артыстамі. І зроблены агульны здымак на светлы ўспамін аб гэтай хвалюючай падзеі.

Марыя ДЗЁМІНА.

Фота Алы Пятліцкай.