Стральба ў Чудзіне

Табельную зброю давялося прымяніць у Чудзіне супрацоўнікам міліцыі, каб супакоіць дэбашыраў.

Ноччу з 1 на 2 сакавіка ў вёсцы Чудзін падвыпіўшыя жыхары з Лунінецкага раёна пачалі высвятляць адносіны з мясцовымі мужчынамі. Спачатку бойка разгарэлася каля кафетэрыя, дзе ўсе ўдзельнікі здарэння адпачывалі. Затым гарачыя палескія хлопцы перамясціліся непасрэдна ў кафэ, дзе канфлікт успыхнуў з новай сілай, ды так, што пашкоджанай аказалася маёмасць райспажыўтаварыства — разбіты бутэлькі са спіртнымі напіткамі ў бары, зламаны крэслы, пацярпела і барная стойка. У выніку бойкі гасцям з Лунінеччыны прыйшлося рэціравацца, але яны вырашылі адпомсціць і ўжо раніцай прыкацілі ў Чудзін увасьмёх на дзвюх машынах, каб разабрацца з крыўдзіцелямі.

У кафетэрыі якраз працавала аператыўна-следчая група РАУС, але гэта не спыніла “пакрыўджаных”. Яны нават паспрабавалі перашкодзіць рабоце супрацоўнікаў міліцыі. Калі ж гэта не ўдалося, то не знайшлі нічога лепшага, як адправіцца за вёску і там пачаць бавіць час за чаркай.

На месца здарэння прыбыў начальнік РАУС Аляксей Яроменка, які разам з двума сваімі падначаленымі пад’ехаў да выпівак, каб разабрацца ў сітуацыі і апытаць аднаго з удзельнікаў канфлікту. Але ўся кампанія вельмі агрэсіўна сустрэла супрацоўнікаў міліцыі і нават пачала пагражаць расправай. Толькі папярэджваючы стрэл у паветра з табельнай зброі спыніў дэбашыраў ад спробы расправы з праваахоўнікамі.

Непасрэдны ўдзельнік начной бойкі і яго найбольш злосны ранішні абаронца былі дастаўлены ў райаддзел міліцыі і атрымалі па 10 сутак арышту за непадпарадкаванне. Прыйдзецца адказваць і за начны дэбош. Зараз падлічваецца шкода, нанесеная райспажыўтаварыству.

Уласн. інф.