Кубак раёна — у каманды “КПД”

1 і 2 сакавіка ў спартыўнай зале СШ № 1 г. Ганцавічы прайшоў кубак раёна па міні-футболе.

Удзел у спаборніцтвах прынялі 8 каманд, якія былі падзелены на дзве групы. Галоўнымі фаварытамі турніру лічыліся каманды “ПМК № 14” і “КПД”.

Па выніках групавога этапа, які прайшоў у суботу, вылучыліся чвэрцьфінальныя пары. Адным з самых напружаных і цікавых атрымалася супрацьстаянне каманд “Хатынічы” і “Ганцавічы-2 — ДЮСШ”. Нягледзячы на тое, што футбалісты з Хатыніч правялі сустрэчу без замен, яны ўсё ж здолелі перамагчы сваіх сапернікаў з лікам 4:1. Вынікі іншых чвэрцьфінальных гульняў наступныя: “КПД” — “Лясгас” — 8:1; “ПМК № 14” — “Люсіна” — 5:0 (тэхнічнае паражэнне); “Раздзялавічы” — “Тарпеда” — 6:3.

Паўфіналы таксама выдаліся цікавымі. І калі ў футбалістаў “КПД” не ўзнікла праблем у сустрэчы супраць каманды “Раздзялавічы” (перамога каманды “КПД” з лікам 8:2), то паядынак паміж “ПМК № 14” і камандай “Хатынічы” атрымаўся вельмі цікавым. Рабяты з Хатыніч хутка забілі два галы і доўгі час гулялі нараўне з больш моцным сапернікам. Аднак індывідуальнае майстэрства футбалістаў каманды з будаўнічай арганізацыі і стомленасць хатыніцкіх рабят у выніку прадвызначылі перамогу “ПМК № 14”. Выніковы лік — 7:3.

Сустрэча за 3-е месца таксама трымала гледачоў у напружанні да фінальнага свістка. “Хатынічы” ў паядынку супраць “Раздзялавіч” мелі перавагу, аднак добрая гульня галкіпера Дзяніса Чыркуна дазволіла раздзялаўцам не прайграць у асноўны час. Сустрэча завяршылася з лікам 1:1, а ў серыі пенальці перамога і з ёю  трэцяе месца дасталіся камандзе “Раздзялавічы”.

Фінальны матч чакалі шматлікія прыхільнікі футбола. Было цікава, ці здолеюць “студэнты”, якія выступалі ў складзе “КПД”, у адсутнасці некалькіх вядучых ігракоў узяць у чэмпіянаце рэванш за паражэнне ад “ПМК № 14”? Нагадаем, тады каманда з будаўнічай арганізацыі атрымала перамогу з лікам 3:2. Але на гэты раз перамога дасталася сапернікам.

Гульня атрымалася па-сапраўднаму фінальнай. Тут былі і эмоцыі, і барацьба, і камбінацыйная гульня, і індывідуальнае майстэрства асобных ігракоў. На працягу ўсёй сустрэчы каманда “ПМК № 14” вяла ў ліку 1:0, 2:1, 3:2. Аднак у рашаючыя хвіліны сустрэчы футбалісты “КПД” аказаліся мацнейшымі. Спачатку, пасля цудоўнай камбінацыі, Ілья Мурашка зрабіў лік 3:3. А за некалькі хвілін да фінальнага свістка Юрый Сайка ўдарам са штрафнога прынёс камандзе “КПД” перамогу. Футбалісты “ПМК № 14” на апошніх секундах мелі дзве выдатныя магчымасці выраўняць лік, але галкіпер “КПД” Андрэй Сайка не дазволіў мячу трапіць у вароты. Такім чынам, фінальны свісток зафіксаваў перамогу каманды “КПД” з лікам 4:3.

Пасля фінальнай сустрэчы адбылася цырымонія ўзнагароджвання пераможцаў. Фіналісты атрымалі кубкі і медалі ад загадчыка сектара спорту і турызму аддзела адукацыі, спорту і турызму райвыканкама Яўгена Кабрынца і старшыні фізкультурна-спартыўнага клуба “Здароўе-7” Міхаіла Ярашэвіча. Таксама былі ўручаны прызы лепшым ігракам фінальнай сустрэчы. Імі сталі Юрый Сайка (“КПД”) і Вадзім Пабудзей (“ПМК № 14”). Прызы аматарскіх сімпатый ад райкама ГА “БРСМ” атрымалі Андрэй Сайка (“КПД”) і Алег Свірыд (“ПМК № 14”). А Іван Вадап’ян з каманды “ПМК № 14” з 14 галамі стаў лепшым бамбардзірам турніру.

Уладзімір САКАЛОЎ.

Фота Яўгена ГУРСКАГА.