Для тых, хто каваў Перамогу

Стала вядома, што ў нашай краіне ў сувязі са святкаваннем 70-й гадавіны вызвалення яе ад нямецка-фашысцкіх захопнікаў ветэранам Вялікай Айчыннай вайны будзе аказана матэрыяльная дапамога. Больш падрабязную інфармацыю дае чытачам “СП” начальнік упраўлення па працы, занятасці і сацыяльнай абароне райвыканкама Наталля КЛЯВЕЦ:

 — Кіраўніком дзяржавы 29 студзеня гэтага года падпісаны адпаведны Указ № 54 “Аб аказанні аднаразовай матэрыяльнай дапамогі”. Аднаразовую матэрыяльную дапамогу ў суме 10 мільёнаў рублёў атрымаюць героі Савецкага Саюза, асобы, узнагароджаныя ордэнамі Славы трох ступеняў, героі Сацыялістычнай Працы, удастоеныя гэтага звання за заслугі ў гады Вялікай Айчыннай вайны.

Матэрыяльная дапамога ў памеры 8 мільёнаў рублёў будзе аказана інвалідам, удзельнікам Вялікай Айчыннай вайны, асобам, якія прымалі ўдзел у складзе спецыяльных фарміраванняў у размініраванні тэрыторый і аб’ектаў пасля вызвалення ад нямецкай акупацыі ў 1943 — 1945 гадах.

Дапамогу ў суме 3,5 мільёна рублёў атрымаюць асобы, узнагароджаныя ордэнамі і медалямі СССР за самаадданую працу і бездакорную воінскую службу ў тыле ў гады Вялікай Айчыннай вайны; асобы, якія працавалі на аб’ектах супрацьпаветранай абароны, мясцовай супрацьпаветранай абароны, на будаўніцтве абаронных збудаванняў, марскіх баз, аэрадромаў і іншых ваенных аб’ектаў у межах тылавых граніц дзеючых франтоў, на прыфрантавых участках чыгуначных і аўтамабільных дарог. Такая ж дапамога будзе аказана членам экіпажаў суднаў транспартнага флоту, інтэгрыраваных у пачатку Вялікай Айчыннай вайны ў партах іншых дзяржаў. Яе атрымаюць асобы, якія працавалі на прадпрыемствах, ва ўстановах, арганізацыях г. Ленінграда ў перыяд блакады з 8 верасня 1941 года па 27 студзеня 1944 года і ўзнагароджаныя медалём “За абарону Ленінграда” і нагрудным знакам “Жыхару блакаднага Ленінграда”.

Матэрыяльная дапамога ў памеры 3,5 мільёна рублёў будзе таксама аказана:

— членам сем’яў ваеннаслужачых, партызан і падпольшчыкаў, якія загінулі (памерлі) у гады Вялікай Айчыннай вайны (бацькам, жонцы, мужу, якія не ўступілі ў новы шлюб, дзецям (у тым ліку ўсыноўленым) і іншым утрыманцам загінуўшага (памерлага), атрымліваючым пенсію з выпадку страты карміцеля;

— інвалідам з дзяцінства ў выніку ранення, кантузіі, калецтва, звязаных з баявымі дзеяннямі ў перыяд Вялікай Айчыннай вайны або з наступствамі ваенных дзеянняў; былым вязням фашысцкіх канцлагераў, турмаў, гета і іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны, якім устаноўлена павышэнне пенсіі па ўказанай падставе ў адпаведнасці з заканадаўствам.

У нашым раёне Указ № 54 “Аб аказанні аднаразовай матэрыяльнай дапамогі” закране на сённяшні дзень 68 чалавек, сярод якіх 28 інвалідаў і ўдзельнікаў Вялікай Айчыннай вайны. Выплата дапамогі будзе ажыццяўляцца за кошт сродкаў рэспубліканскага бюджэту ў перыяд з 1 чэрвеня па 1 ліпеня гэтага года.