Конкурс на лепшае навагодняе афармленне

Населены пункт, дзе мы жывём, — гэта наш агульны дом. І нам прыемна бачыць яго прыгожым у любую пару года. Вясной, летам і восенню яго могуць удала аздобіць кветкавыя кампазіцыі, а ўтульнасць ствараюць чысціня і парадак. Але ж і зімой ёсць нямала магчымасцей для таго, каб зрабіць нашы населеныя пункты і месцы, дзе жывём і працуем, незвычайнымі, адметнымі, вабячымі людское вока. Ды і падстава для гэтага ёсць цудоўная — навагоднія і калядныя святы. А сапраўдныя гаспадары сустракаюць святы ў чыстай, упрыгожанай хаце. І кожны чалавек, кожны калектыў робіць гэта па-свойму, але з добрай мэтай — стварыць святочны настрой сабе і іншым. А яшчэ можа паўдзельнічаць у конкурсе на лепшае навагодняе афармленне арганізацый, устаноў горада, прадпрыемстваў усіх форм уласнасці, прыватных домаўладанняў, які аб’яўлены райвыканкамам і праводзіцца ў нашым горадзе ўжо не першы год.

Высакародная мэта гэтага конкурсу — актывізацыя дзейнасці працоўных калектываў ва ўдзеле ў святочным афармленні тых арганізацый, устаноў, дзе працуюць, выяўленне лепшых мастацка-афарміцельскіх рашэнняў па стварэнні эстэтычна прывабнага навагодняга асяроддзя, святочнай атмасферы і цудоўнага настрою ў жыхароў горада.

Конкурс праводзіцца ў адзін этап: з 11 па 25 снежня 2013 года. Яго вынікі будуць падведзены раённай камісіяй 26 снежня 2013 года.

Конкурс праводзіцца па наступных намінацыях:

— лепшае святочнае афармленне прадпрыемстваў прамысловасці, жыллёва-камунальнай гаспадаркі;

— лепшае святочнае афармленне прадпрыемстваў гандлю, грамадскага харчавання райспажыўтаварыства;

— лепшае святочнае афармленне абслугоўваючых прадпрыемстваў горада, транспарту, сувязі, бытавога абслугоўвання;

— лепшае святочнае афармленне ўстаноў адукацыі, аховы здароўя, культуры і спорту;

— лепшае святочнае афармленне прыватных домаўладанняў, шматкватэрных жылых дамоў (вокны, балконы, лоджыі);

— лепшае святочнае афармленне аб’ектаў гандлю і паслуг малога прадпрымальніцтва.

Крытэрыі ацэнкі наступныя: арыгінальнасць афармлення, інавацыйны і комплексны падыходы; магчымасць агляду навагодняга афармлення з вуліцы, тэматыка і эстэтычнасць; навагодняе афармленне прылягаючай тэрыторыі; візуальнае ўспрыняцце афармлення ў дзённы і начны час; мастацка-тэхнічная якасць афармлення.

Пераможцы конкурсу ў кожнай яго намінацыі будуць узнагароджаны прызамі.

Аддзел ідэалагічнай работы, культуры

і па справах моладзі райвыканкама.