Рыба не мяса, але…

У рацыёне многіх народаў рыба з’яўляецца самым важным прадуктам. Любяць рыбу і ў нас, але яна не  кожны дзень на нашым стале. Маю на ўвазе свежую рыбу.

Марской рыбы ў крамах хапае. Ёсць марожаная, салёная, вэнджаная, а пра кансервы я наогул маўчу. Што датычыць свежай рыбы, то купіць можна толькі прэснаводную. Яна бадай што самая даступная па цане.

У мінулую нядзелю на Цэнтральным і Аляксееўскім рынках у Баранавічах сваю прадукцыю прадаваў рыбгас “Лактышы”, і да аўтамашыны з карпам і амурам выстройваліся чэргі, бо цана, па нашым часе, была невысокай.  Буйны карп “ішоў” па 24900 рублёў за кілаграм, а амур — па 26 тысяч. На Цэнтральным рынку побач з рыбгасам гандляваў карпам і карасём фермер, але каля яго аўтамашыны  народ не тоўпіўся, бо цана карпа была значна вышэй — 29000 рублёў.

Пацікавіўся ў дырэктара рыбгаса “Лактышы” Івана Цыгана наконт кошту рыбы, бо мне падалося, што цана на яе даволі нізкая, ва ўсякім разе ў параўнанні з канкурэнтамі.

— Цана нармальная, бо калі падняць яе вышэй, можна адштурхнуць пакупніка. Вось і прыходзіцца манеўраваць коштам. Дарэчы, цана залежыць і ад памеру рыбы. Калі яе вага 251 — 400 грамаў, то кошт меншы, чым буйнога карпа.

— Але ж цану апускаць можна да пэўнай мяжы.

— Сапраўды так, усё трымаецца на разліку. На кілаграм рыбы неабходна патраціць прыкладна 3 кілаграмы камбікорму, які каштуе 3500 руб./кг. Вось і атрымліваецца, што корм  складае 40 — 50 працэнтаў ад усіх затрат. Камбікорм купляем у Пінску і Пухавічах, а ў Баранавічах ён больш дарагі.

— А якая рэнтабельнасць?

— Пакуль што яна 3 працэнты, але ўсё “завязана” на цане. Падняць яе можна было б, але ж нам рыбу трэба прадаваць, а не любавацца ёю.

— Дзе рыбгас збывае сваю прадукцыю?

— Рэгіён у нас даволі вялікі. У асноўным гэта Мінск, Баранавічы, Навагрудак, Карэлічы, Клецк… У тыдзень прадаём прыкладна па 15 — 20 тон рыбы.

— А ці ёсць перспектывы? І якія ў вас планы?

— Добра было б павялічыць аб’ёмы і давесці іх да 1 тысячы тон рыбы ў год. Але ж многае  тут залежыць ад цаны камбікорму. Калі яна павысіцца, то асабліва не разгонішся, ды і план аб’ёму не толькі ад нас залежыць.

— Здаралася бачыць, як пакупнікі стаяць каля рыбы і вагаюцца: не ведаюць, браць ім карп ці амур. Парайце.

— Няхай кожны пакаштуе і таго, і другога і тады будзе ведаць. Я толькі скажу, што амур харчуецца воднымі раслінамі і мяса ў яго, на мой погляд, больш далікатнае. Але ж, як ведаеце, на густ і…

Ад сябе скажу, што мая самая любімая страва — гэта карп фаршыраваны. Вось яго рэцэпт.

Вазьміце кілаграмовага карпа, ачысціце ад лускі, адрэжце галаву і, не разразаючы жывата, выпатрашыце. Затым тушку карпа трэба парэзаць на кавалкі памерам 6-7 см і нажом асцярожна зняць з іх скурку.

Галаву рыбіны (без вачэй і жабраў) і хвост трэба пакласці ў каструлю, апусціць туды скрылікі морквы, буракоў, дадаць соль і перац, заліць халоднай вадой і варыць.

Цяпер неабходна зрэзаць мяса карпа з касцей і прапусціць яго разам з цыбуляй і размочаным у малацэ пшанічным хлебам  праз мясарубку. У фарш дадаць соль, молаты перац і сырое яйка. Гэтым фаршам запоўніць кольцы скуркі. Вось і гатовы порцыі, якія неабходна  апусціць у каструлю з кіпячым адварам. Варыць 1,5 гадзіны, але пры гэтым каструля не павінна быць зачыненай.

Карпа рэкамендуецца астудзіць і падаваць на стол разам з хрэнам.

На 1 кг рыбы: 30 г пшанічнага хлеба, 1 яйка, 1 цыбуліна, 1 бурак, 2 морквы, 1 лаўровы ліст, чорны перац, соль.

Можна такім чынам нафаршыраваць і шчупака.    

Дарэчы, фаршыраванне карпа — гэта мужчынская справа.

Уладзіслаў СНІТКА.

Фота аўтара.