Не сячыце елкі самавольна

Набліжаюцца навагоднія святы, і ў гэты час актуальнай задачай дзяржаўнай лясной аховы ДЛГУ “Ганцавіцкі лясгас” з’яўляецца ахова хвойных дрэў ад незаконнай высечкі.

Лясгас сумесна з міжраённай інспекцыяй аховы жывёльнага і расліннага свету, раённай інспекцыяй прыродных рэсурсаў і аховы навакольнага асяроддзя і супрацоўнікамі РАУС будуць рэгулярна праводзіць аператыўныя рэйдавыя мерапрыемствы па выяўленні і прыцягненні да адказнасці парушальнікаў ляснога і прыродаахоўнага заканадаўства.

Згодна з артыкулам 15.22 Кодэкса аб адміністрацыйных правапарушэннях Рэспублікі Беларусь за незаконнае знішчэнне, у тым ліку і за незаконную высечку альбо пашкоджанне дрэў, прадугледжана адказнасць у выглядзе штрафу да 30 базавых велічынь (3,9 мільёна рублёў), а ў лясах першай групы — ад 5 да 50 базавых велічынь (ад 650 тысяч да 6,5 мільёна рублёў).

Акрамя таго, Указам Прэзідэнта Рэспублікі Беларусь ад 24.06.2008 года № 348 зацверджаны таксы для вызначэння кампенсацыі шкоды, якая нанесена лясам і аб’ектам расліннага свету. Так, за незаконнае знішчэнне аднаго хвойнага дрэва дыяметрам да 12 сантыметраў памер шкоды складае 0,1 базавай велічыні, ці 913 тысяч рублёў. Да таго ж калі адабранае незаконна ссечанае дрэва немагчыма будзе з-за пашкоджанняў прадаць, то парушальнік будзе абавязаны выплаціць яшчэ 1 базавую велічыню ў адпаведнасці з Пастановай Савета Міністраў Рэспублікі Беларусь ад 20.07.2001 года. Такім чынам, за незаконна ссечанае дрэва ў лясах першай групы парушальніку давядзецца заплаціць ад 793 тысяч рублёў і болей.

У той жа час на ёлачных кірмашах райцэнтра навагодняе дрэва можна набыць значна танней — у сярэднім ад 33600 да 53400 рублёў. Таму тым, хто вырашыць нарыхтаваць яго самастойна, не маючы на гэта дазволу, варта падумаць аб далейшых наступствах.

Звяртаю ўвагу на тое, што на ёлачных кірмашах будуць прадавацца навагоднія дрэвы вышынёй да 2 метраў. Звыш 2 метраў — будуць рэалізоўвацца па папярэдніх заказах, якія прымаюцца па тэлефонах: 2-67-11, 2-67-12.

Кожны, хто пажадае самастойна выбраць лясную прыгажуню непасрэдна ў лесе, можа звяртацца ў бліжэйшае лясніцтва, аплаціць квітанцыю на дазвол і ў прысутнасці лесніка ссекчы дрэва, якое спадабаецца.

Пры жаданні можна набыць ёлку і ў лясніцтвах лясгаса.

Наталля ЗЫБАЙЛА,

намеснік дырэктара ДЛГУ “Ганцавіцкі

лясгас”.