Актывізацыя прафілактыкі злачынстваў

Каардынацыйная нарада па прадухіленні прычын, якія садзейнічаюць здзяйсненню злачынстваў і правапарушэнняў, прайшла пад старшынствам пракурора раёна Сяргея Насені на мінулым тыдні. Непасрэдны ўдзел у ёй кіраўніка раёна Аляксандра Саланевіча і першага намесніка пракурора Брэсцкай вобласці Сяргея Тураўца падкрэслівала важнасць абмяркоўваемай тэмы.

Пракурор раёна акрэсліў праблемныя моманты, якія негатыўна ўплываюць на крымінагенную сітуацыю на Ганцаўшчыне. Агульная колькасць злачынстваў па раёне сёлета ў параўнанні з мінулым годам крыху знізілася — са 140 да 125, але іх раскрыццё знаходзіцца на вельмі нізкім узроўні — 53 працэнты. У той жа час назіраюцца рост злачынстваў у сферы сямейна-бытавых адносін і  тэндэнцыя павелічэння колькасці злачынстваў, здзейсненых раней судзімымі асобамі. Існуюць пытанні да работнікаў райаддзела ўнутраных спраў і па прафілактыцы незаконнага абароту наркотыкаў, іх ужывання і распаўсюджвання (з пачатку года зарэгістраваны толькі адзін факт такога злачынства). Між іншым, статыстыка вялікіх гарадоў сведчыць, што праблема наркотыкаў даволі актуальная, і калі так, то і на Ганцаўшчыне не можа быць усё ў парадку. Таму міліцыі варта актыўна працаваць у гэтым накірунку.

Адзначалася і недапрацоўка супрацоўнікаў ДАІ. Імі з пачатку года выяўлена звыш 4 тысяч правапарушэнняў. Здаецца, многа, але калі параўноўваць з іншымі рэгіёнамі, то на душу насельніцтва гэта самы нізкі паказчык па вобласці. Да таго ж ёсць пытанні па прафілактыцы п’янства за рулём. Сёлета ўжо 117 чалавек пазбаўлены вадзіцельскіх правоў за тое, што кіравалі аўтамабілямі на падпітку. Усяго ж на Ганцаўшчыне налічваецца звыш 330 чалавек, у адносінах да якіх дзейнічае забарона на кіраванне транспартнымі сродкамі за гэтае правапарушэнне. Але ці ўсе яны яе прытрымліваюцца? — таксама актуальнае пытанне.

Ёсць над чым падумаць і работнікам сельвыканкамаў, бо на тэрыторыі пяці сельсаветаў адзначаецца рост колькасці злачынстваў. Увогуле, як заўважыў старшыня райвыканкама Аляксандр Саланевіч, пэўныя пытанні па прафілактыцы злачынстваў і правапарушэнняў існуюць найперш з-за таго, што няма цеснага ўзаемадзеяння паміж зацікаўленымі службамі і грамадскасцю. Таксама варта разумець, што калі ты з’яўляешся прадстаўніком улады — участковым інспектарам, напрыклад, ці работнікам сельвыканкама, то павінен адрэагаваць на любое правапарушэнне і зрабіць заўвагу. Толькі агульнымі намаганнямі, пад уздзеяннем грамадства магчыма карэнным чынам змяніць сітуацыю.

Падчас нарады ўзнімалася пытанне і аб магчымасці арганізацыі ў раёне наркалагічнага аддзялення для адпаведнай катэгорыі грамадзян. Яны б праходзілі лячэнне і працавалі на карысць грамадства, што стала б наглядным прыкладам для астатніх аматараў “горкай” і парушальнікаў грамадскага парадку. Усё ж такі пераважная большасць правапарушэнняў і злачынстваў здзяйсняецца ў стане алкагольнага ап’янення, і менавіта  праблема злоўжывання спіртнымі напіткамі выходзіць на першы план. Прапанова аб стварэнні наркалагічнага аддзялення, якую ўнёс старшыня суда раёна Іван Мяшкевіч, будзе дэталёва разгледжана.

Аляксей ГРУШЭВІЧ.