Прафесія, патрэбная заўсёды

Прафесія юрыста была і будзе запатрабавана заўсёды. Ні адзін кіраўнік не падпіша які-небудзь дагавор, кантракт або іншы важны дакумент, не атрымаўшы кансультацыю юрыста. Таму кожнае прадпрыемства і арганізацыя імкнуцца знайсці сабе граматнага і кваліфікаванага спецыяліста ў галіне правазнаўства. Цэнтру банкаўскіх паслуг № 107 філіяла № 802 ААТ “ААБ Беларусбанк” пашанцавала. Ужо на працягу амаль 8 гадоў тут працуе малады, мэтанакіраваны і адказны юрыст Сяргей Лапіч (НА ЗДЫМКУ).

Сяргей родам з вёскі Боркі. Па яго словах, юрыстам ён пажадаў стаць у старэйшых класах. Пасля заканчэння СШ № 1 Сяргей Лапіч паступіў у Гродзенскі дзяржаўны ўніверсітэт імя Янкі Купалы на юрыдычны факультэт (спецыяльнасць “правазнаўства”) і такім чынам стаў на адзін крок бліжэй да сваёй мары. Пасля таго, як малады чалавек атрымаў вышэйшую адукацыю, ён быў прызваны на службу ў армію.

“Пасля арміі некаторы час шукаў работу ў Гродне, дзе вучыўся, — адзначае ў размове Сяргей. — Горад на Нёмане сам па сабе вельмі прыгожы і ўтульны, адзін з прыгажэйшых у нашай краіне, таму спачатку хацеў застацца там”.

Аднак лёс склаўся па-іншаму. Аднойчы, калі Сяргей на выхадныя прыехаў да бацькоў, ён звярнуў увагу на аб’яву ў раённай газеце аб тым, што Беларусбанку патрабуецца юрыст. Доўга не думаючы, малады чалавек вырашыў прайсці субяседаванне. І ўжо праз тры дні Сяргей Лапіч заняў пасаду юрыста цэнтра банкаўскіх паслуг № 107 філіяла № 802 ААТ “ААБ Беларусбанк”. Першы працоўны дзень — 1 лютага 2006 года — застанецца ў памяці Сяргея Сяргеевіча назаўсёды.

У банку Сяргей Лапіч займаецца прававым забеспячэннем банкаўскай дзейнасці. Ён правярае адпаведнасць дзеючаму заканадаўству крэдытных, гаспадарчых і іншых дагавораў, ажыццяўляе кантроль за выкананнем разнастайных загадаў ЦБП № 107 філіяла 802 ААТ “ААБ Беларусбанк”, аказвае юрыдычную і прававую дапамогу яго работнікам. Яшчэ адным з пунктаў дзейнасці юрыста з’яўляецца вядзенне прэтэнзіённай іскавай работы. Гэта значыць, што калі фізічная ці юрыдычная асоба, з якой банк заключыў крэдытны дагавор, ухіляецца ад выплаты крэдыту, то вырашэнне ўсіх пытанняў з крэдыторамі кладзецца на плечы Сяргея Лапіча. Калі крэдытор добраахвотна не разлічваецца з банкам, то юрыст збірае ўсе неабходныя дакументы і накіроўвае справу ў суд. Тады ўжо ў парушальнікаў не застаецца ніякіх іншых варыянтаў, як выплаціць крэдыт.

Хоць справа юрыста цяжкая, адказная і складаная, але Сяргею яна падабаецца. “Вельмі задаволены, што знайшоў сябе ў любімай справе”, — падкрэслівае малады правазнаўца. Больш таго, Сяргей хутка атрымае другую вышэйшую адукацыю: ён завочна заканчвае вучобу ў Беларускім дзяржаўным эканамічным універсітэце.

Разам з жонкай Вольгай, якая працуе на станцыі пералівання крыві, Сяргей Лапіч выхоўвае дваіх дзяцей — Андрэя і Арыну, будуе дом. І, здаецца, цалкам задаволены тым, як складваецца яго лёс і жыццё.

Уладзімір САКАЛОЎ.

З УЗНАГАРОДАЙ!

Ганцавіцкі раённы выканаўчы камітэт ВЫРАШЫЎ:

за высокі прафесіяналізм, значны асабісты ўклад у фарміраванне прававой культуры насельніцтва Ганцавіцкага раёна і ў сувязі з прафесійным святам – Днём юрыста

ўзнагародзіць Граматай Ганцавіцкага райвыканкама:

ШмЯнько Наталлю Іванаўну, сакратара судовых пасяджэнняў суда Ганцавіцкага раёна;

уручыць Пісьмо-падзяку Ганцавіцкага райвыканкама:

Лапічу Сяргею Сяргеевічу, галоўнаму юрысконсульту цэнтра банкаўскіх паслуг № 107 філіяла № 802 адкрытага акцыянернага таварыства “Ашчадны банк “Беларусбанк” у г. Ганцавічы.

х х х

Прэзідыум Ганцавіцкага раённага Савета дэпутатаў ВЫРАШЫЎ:      

за добрасумленную працу ў органах юстыцыі, высокі прафесіяналізм, значны асабісты ўклад у фарміраванне прававой культуры насельніцтва Ганцавіцкага раёна і ў сувязі з прафесійным святам — Днём юрыста

ўручыць Пісьмо-падзяку Ганцавіцкага раённага Савета дэпутатаў:

БРУЙ Таццяне Уладзіміраўне, сакратару суда Ганцавіцкага раёна;

ТАНКЕВІЧ Вользе Аляксандраўне, дзяржаўнаму натарыусу дзяржаўнай натарыяльнай канторы Ганцавіцкага раёна.