Наркатычны дурман

Вынікі апошняга дзяжурства добраахвотнай дружыны аховы правапарадку пры райвыканкаме, якое прайшло ў мінулую суботу, выклікаюць трывогу. Сярод затрыманых за парушэнне грамадскага парадку аказаліся як дарослыя, так і непаўналетнія, некаторыя з іх знаходзіліся ў стане наркатычнага ап’янення.

Першым, хто папаўся дружыннікам, стаў гараджанін Фёдар К., які не знайшоў нічога лепшага, як прымасціцца на дзіцячай пляцоўцы ў двары дома № 3-а па вуліцы Кастрычніцкай і распіваць там спіртное. На заўвагі паводзіў сябе агрэсіўна і нават выкліканаму нараду міліцыі прыйшлося прымяняць сілу, каб супакоіць буяна і даставіць яго ў райаддзел. Такое сустрэнеш не часта, бо большасць людзей на падпітку ўсё ж такі паводзіць сябе з дружыннікамі адэкватна і спакойна рэагуе на заўвагі. Але калі не разумее чалавек, што нельга піць спіртное ў грамадскіх месцах, дык адкажа за гэта ў адміністрацыйным парадку.

А вось навучэнец адной з устаноў адукацыі райцэнтра сапраўды шакіраваў членаў добраахвотнай дружыны. Па вуліцы Гагарына, насупраць гарадскога сквера, у пачатку 12-й гадзіны ночы ён збіраў на асфальце… грыбы. Калі да яго падышлі дружыннікі, малады чалавек кінуўся наўцёкі і, зрабіўшы круг, вярнуўся да іх. Спецыфічны пах алкаголю адсутнічаў, а пашыраныя зрэнкі і неадэкватныя паводзіны, яўныя прыкметы наркатычнага ап’янення, далі падставу даставіць хлопца для далейшага выяўлення абставін у РАУС.

Праз гадзіну ў поле зроку дружыннікаў трапіла і кампанія маладых людзей каля кафэ “Адпачынак”. Сярод іх аказалася двое навучэнцаў у стане алкагольнага ап’янення, што пацвердзілася на медыцынскім аглядзе. Алкатэстар паказаў у іх 1,2 і 1,4 праміле.

І на завяршэнні дзяжурства, прыкладна каля гадзіны ночы, дружыннікі спаткалі маладога мужчыну з прыкметамі наркатычнага ап’янення, які застыў пасярэдзіне праезнай часткі дарогі і проста глядзеў у адну кропку. Потым, як ён сам патлумачыў, яго не першы раз затрымліваюць па падазрэнні ва ўжыванні наркотыкаў.

Сам факт таго, што за некалькі гадзін дзяжурства дружыннікі затрымалі двух чалавек з прыкметамі наркатычнага ап’янення, сведчыць аб многім. Распаўсюджванне наркотыкаў — тых жа спайсаў (курыцельных сумесей з дабаўленнем моцных сінтэтычных наркотыкаў),  становіцца сапраўднай праблемай, тым больш, што іх можна з лёгкасцю набыць на тэрыторыі суседніх краін — Украіны і Расіі. Каб трымаць сітуацыю ў раёне пад кантролем, неабходна прымаць жорсткія меры да аматараў “кайфу”. Інакш ужыванне наркатычных рэчываў, асабліва ў маладзёжным асяроддзі, можа прыняць катастрафічны абарот.

Крысціна СТРАЛЬЧЭНЯ,

спецыяліст

па справах моладзі

райвыканкама.