Заробкі з мінімальнай падатковай нагрузкай

У Беларусі, як вядома, вызначаны віды рамесніцкай дзейнасці, якія могуць ажыццяўляць фізічныя асобы без афармлення індывідуальнага прадпрымальніцтва. Дастаткова толькі аплаціць падатак у памеры 1 базавай велічыні (130 тысяч рублёў) на 1 год.

На Ганцаўшчыне шмат таленавітых майстроў, якія займаюцца бондарствам, вышыўкай, кавальскай справай і г.д. Прадукцыю многіх з іх інакш, як мастацкімі творамі, і не назавеш. Але яшчэ неабходна знайсці на іх пакупнікоў, што не ў кожнага атрымліваецца.

Тым не менш, як адзначае начальнік аддзела падаткаабкладання фізічных асоб і індывідуальных прадпрымальнікаў інспекцыі Міністэрства па падатках і зборах па Ганцавіцкім раёне Валерый Лосік, на сённяшні дзень у нас афіцыйна ажыццяўляюць рамесніцкую дзейнасць 17 чалавек, якія знайшлі сваю нішу на рынку і маюць неблагі прыбытак.

“Майстрых, якія вырабляюць ручнікі, у нас вельмі шмат, і такі тавар цяжка прадаць, — расказвае Валерый Аляксандравіч. — Напрыклад, на Брэстчыне цяжка знайсці пакупнікоў, бо рынак перанасычаны, а праца працаёмкая. І ніхто за бясцэнак не пагадзіцца прадаваць той жа ручнік ці вышыванку. Але ў той жа час адна з ганцаўчанак сталага ўзросту, дарэчы, выдатная майстрыха, актыўна рэалізуе свае работы ў Віцебску і Гродне — там на такі тавар даволі добры попыт. Удала  ідуць справы і ў аднаго з вяскоўцаў, які з’яўляецца спецыялістам па дрэве, — яго альтанкі карыстаюцца павышаным попытам і ў нашым рэгіёне. Увогуле, як паказвае практыка, нават пляценне кошыкаў прыносіць неблагі прыбытак. Такім чынам, тут усё залежыць ад саміх людзей”.

Таксама Валерый Аляксандравіч адзначыў, што з мінімальнай падатковай нагрузкай для фізічных асоб на Ганцаўшчыне ажыццяўляюцца такія віды дзейнасці, як рамонт і пераробка трыкатажных вырабаў. Пры гэтым аплачваецца толькі збор у суме 180 тысяч рублёў у месяц, які працуеш, за паслугі рэпетытара — 135 тысяч рублёў. Але большасць ганцаўчан, а менавіта 29 чалавек, займаюцца аказаннем паслуг па вырошчванні сельскагаспадарчай прадукцыі, дзе збор складае ўсяго 55 тысяч рублёў у месяц.

Аляксей Грушэвіч.