Возбуждено уголовное дело в отношении чиновника

Камітэтам дзяржаўнага кантролю Брэсцкай вобласці сумесна з упраўленнем па раскрыцці цяжкіх эканамічных злачынстваў УУС аблвыканкама праведзена праверка аддзела адукацыі, спорту і турызму Камянецкага райвыканкама. Устаноўлена, што адказнымі асобамі аддзела дапушчаны значныя парушэнні заканадаўства аб дзяржаўных закупках пры выбары ў 2012 годзе падрадчыка (прыватнае прадпрыемства “Камянец-Сэрвіс”) для выканання работ па рамонце двух аўтобусаў. У тым ліку не была апублікавана працэдура запыту цэнавых прапаноў на рамонт аўтобусаў  (не размешчана ў сетцы Інтэрнэт, на афіцыйным сайце інфармацыйнага рэспубліканскага ўнітарнага прадпрыемства “Нацыянальны цэнтр маркетынгу і кан’юнктуры цэн”). Гэтым дапушчана не прадугледжанае заканадаўствам абмежаванне доступу пастаўшчыкоў паслуг да ўдзелу ў працэдуры дзяржаўнай закупкі.

У выніку нанесена шкода (выкарыстоўваліся сродкі раённага бюджэту) на суму больш за 197 мільёнаў рублёў у выглядзе неабгрунтаванага атрымання прыватным прадпрыемствам “Камянец-Сэрвіс” вышэйзгаданых грашовых сродкаў па прычыне завышэння кошту выкананых работ па рамонце аўтобусаў, а менавіта ў значным (па асобных пазіцыях — да 38 разоў) завышэнні працаёмкасці работ (колькасці норма-гадзін на аперацыю).

Пры гэтым, як устаноўлена пры праверцы “Камянец-Сэрвісу”, гэтае прыватнае прадпрыемства рамантавала згаданыя аўтобусы (для перавозкі дзяцей) без наяўнасці сертыфіката адпаведнасці на выкананне рамонтных работ па такой катэгорыі транспартных сродкаў (М3).

Па выніках праверкі аддзелу адукацыі зменшаны асігнаванні на 129,2 мільёна рублёў, якія павінны былі пайсці на аплату падрадчыку. Матэрыялы праверкі накіраваны ў праваахоўныя органы.

У адносінах да начальніка аддзела адукацыі, спорту і турызму Камянецкага райвыканкама пракуратурай Брэсцкай вобласці ўзбуджана крымінальная справа.

Акрамя гэтага, у “Камянец-Сэрвісе” выяўлены шматлікія парушэнні заканадаўства аб тэхнічным нармаванні і стандартызацыі, бухгалтарскім уліку і справаздачнасці, выкарыстанні касавага абсталявання і парадку вядзення касавых аперацый.

Так, без наяўнасці сертыфіката адпаведнасці прадпрыемства аказала паслуг больш чым на 310 мільёнаў рублёў без захоўвання тэхнічных нарматыўных, прававых актаў у галіне тэхнічнага нармавання і стандартызацыі па якасці і іншых патрабаванняў на суму больш за 140 мільёнаў рублёў.

Такім чынам, у адносінах да “Камянец-Сэрвісу” і дырэктара гэтага прадпрыемства складзена 7 пратаколаў аб адміністрацыйных правапарушэннях са штрафнымі санкцыямі на суму больш чым 123 мільёны рублёў.