Пьяный слесарь угнал трактор…

Больш жорсткія пакаранні за кіраванне транспартнымі сродкамі ў стане алкагольнага ап’янення не спыняюць асабліва ліхіх асоб ад жадання пракаціцца на падпітку.

Вось і на мінулым тыдні, вечарам 15 лістапада, п’яны слесар СВК “Бярозавец” Сяргей Шапялевіч на трактары сельгаскааператыва гойсаў па Малькавічах. Правапарушэнне здзейснена ім паўторна на працягу года. Як вядома, цяпер за гэта прадугледжана канфіскацыя транспартнага сродку, але не ў згаданым выпадку, бо кіраўніцтва СВК паведаміла аб крадзяжы трактара. Такім чынам, 22-гадоваму ліхачу цяпер пагражае пакаранне за два здзейсненыя ім злачынствы. Ва ўсіх абставінах справы разбіраюцца праваахоўныя органы.

Яшчэ больш нахабна дзейнічаў гараджанін Андрэй Герасіменя. У свой час яго асудзілі за паўторнае кіраванне транспартным сродкам у стане алкагольнага ап’янення, а затым яму яшчэ прыйшлося адказваць перад законам і за грабеж. Знаходзячыся на ўліку ў крымінальна-выканаўчай інспекцыі, ён, пазбаўлены вадзіцельскіх правоў, 29 верасня вырашыў праехацца на ўласнай “Таёце-Кароле”, ды яшчэ і на падпітку. У адносінах да Герасімені ўзбуджана крымінальная справа за невыкананне прыгавору суда, а таксама вырашаецца пытанне аб узбуджэнні крымінальнай справы за язду ў стане алкагольнага ап’янення. Зразумела, што ў гэтым выпадку аўтамабіль будзе канфіскаваны. Дарэчы, машына ўжо знаходзіцца на штрафстаянцы.

Увогуле, у нашым раёне існуе шмат пытанняў у адносінах да грамадзян, якія былі пазбаўлены вадзіцельскіх правоў за п’янку, але зноў садзяцца за руль. Таму, як паведаміў начальнік аддзялення ДАІ РАУС Вячаслаў Гуліцкі, у мэтах прафілактыкі і прадухілення злачынстваў, супрацоўнікі дзяржаўтаінспекцыі мэтанакіравана адпрацоўваюць усіх “беспраўнікаў” з падключэннем іншых супрацоўнікаў райаддзела ўнутраных спраў і членаў добраахвотных дружын, якія папярэдне інфармуюцца аб асобах, якія пазбаўлены правоў, і іх транспартных сродках, калі такія ёсць.

Своечасова спыніць правапарушэнне — значыць прадухіліць магчымыя трагічныя наступствы.

Аляксей ГРУШЭВІЧ.