Заработная плата ў арганізацыях раёна

Намінальная налічаная сярэднямесячная заработная плата ў цэлым па арганізацыях раёна за 9 месяцаў 2013 года склала 3560,8 тысячы рублёў пры сярэднеабласным паказчыку 4379,4 тысячы рублёў.

Такім чынам, на Ганцаўшчыне адна з самых невысокіх зарплат у вобласці, што абумоўлена сельскагаспадарчай накіраванасцю раёна і адсутнасцю буйных прадпрыемстваў. Дарэчы, яшчэ ніжэй заработная плата ў Столінскім раёне — 3472 тысячы рублёў, і на адным узроўні з Маларыцкім раёнам — 3569,7 тысячы рублёў. А лідарам па заработнай плаце, безумоўна, застаецца Брэст, дзе яна за 9 месяцаў склала 4981,9 тысячы рублёў.

Амаль не змянілася сітуацыя і ў верасні. У кантрольным месяцы намінальная налічаная заработная плата на Ганцаўшчыне склала 3990,8 тысячы рублёў, што на парадак ніжэй за абласны паказчык — 4753,5 тысячы рублёў.

Рэальная заработная плата, разлічаная з улікам росту спажывецкіх цэн на тавары і паслугі, у верасні ў параўнанні з аналагічным месяцам мінулага года павялічылася ў раёне на 11,4 працэнта, а ў параўнанні са жніўнем 2013 года — зменшылася на 3,5 працэнта.

У верасні 2013 года самая высокая намінальная налічаная сярэднямесячная заработная плата па раёне, а менавіта звыш 6 мільёнаў рублёў, атрымалася на прадпрыемстве меліярацыйных сістэм, у раёне электрасетак, ПМК-14, на раённым вузле электрасувязі, у цэнтры банкаўскіх паслуг № 107 ААТ “ААБ “Беларусбанк”, падраздзяленні філіяла УП “Белтэхагляд” і на ўчастку РУП “Беларуснафта — Брэстаблнафтапрадукт”.

Самыя ж нізкія заработныя платы адзначаюцца ў такіх відах эканамічнай дзейнасці, як аказанне камунальных, сацыяльных і персанальных паслуг, — 2792,4 тысячы рублёў, гасцініцы і рэстараны — 3021,7 тысячы рублёў, сельская гаспадарка, паляванне і лясная гаспадарка — 3625 тысяч рублёў. Прычым калі разглядаць асобна, то ў ДЛГУ “Ганцавіцкі лясгас” заробкі склалі 4527,7 тысячы рублёў. Сярод сельгасарганізацый самая высокая зарплата ў СВК “Дубнякі” — 3442,5 тысячы рублёў, а самая нізкая ў СВК “Крышылавічы” — 2387,3 тысячы рублёў.

У адукацыі сярэдняя зарплата ў верасні 2013 года зарэгістравана на ўзроўні 3268,7 тысячы рублёў, у галіне аховы здароўя — 3240,2 тысячы рублёў.

Паводле інфармацыі

Галоўнага

статыстычнага

ўпраўлення

Брэсцкай вобласці