Платныя паслугі ў бюджэтнай сферы

У адпаведнасці з Бюджэтным кодэксам Рэспублікі Беларусь, бюджэтныя арганізацыі, акрамя статутнай (бюджэтнай) дзейнасці, маюць права займацца і пазабюджэтнай дзейнасцю.

Ва ўмовах рыначных адносін для кожнай арганізацыі ўсё большае значэнне набываюць развіццё і павелічэнне аб’ёму аказваемых платных паслуг. Такая неабходнасць існуе і ў такіх сферах дзейнасці, як адукацыя, культура, медыцынскае абслугоўванне.

У складаных фінансавых умовах пазабюджэтная дзейнасць — гэта адна з магчымасцей забяспечыць паступленне грашовых сродкаў для найбольш поўнага задавальнення патрэбнасцей арганізацый. Так, за дзевяць месяцаў 2013 года ва ўстановы, фінансуемыя з бюджэту,  пазабюджэтных сродкаў паступіла на суму 2593 мільёны рублёў, за аналагічны перыяд 2012 года — 1921,8 мільёна, рост склаў 135 працэнтаў.

Пералік паслуг, аказваемых установамі адукацыі нашага раёна, уключае ў сябе больш за 20 відаў. Паступленні фарміруюцца за кошт рэалізацыі адукацыйных паслуг, экскурсій, платных гурткоў, тэсціравання, транспартных паслуг, паслуг спартзалаў, здачы ў арэнду памяшканняў. За дзевяць месяцаў бягучага года яны склалі 303,2 мільёна рублёў, або 11,7 працэнта ад удзельнай вагі ўсіх пазабюджэтных паступленняў.

Аддзелам культуры аказваюцца такія платныя паслугі насельніцтву, як навучанне ў дзіцячай школе мастацтваў, правядзенне дыскатэк, канцэртаў, аказанне паслуг па ксеракапіраванні, карыстанні камп’ютарам, відэапаказ, арганізацыя музейных выстаў, шоу-мерапрыемстваў, пастановак лялечнага тэатра. Сёлета за дзевяць месяцаў установамі культуры атрымана 446,1 мільёна рублёў, або 17,2 працэнта ад удзельнай вагі ўсіх пазабюджэтных паступленняў.

Не выключаючы бясплатнага характару аказання медыцынскай дапамогі, сфарміраваны шэраг платных паслуг ва ўстановах аховы здароўя. У тым ліку Ганцавіцкай цэнтральнай раённай бальніцай аказваюцца наступныя платныя паслугі — рэфлексатэрапія, зубапратэзаванне і зубалячэнне, масаж, медагляд, лабараторныя і ультра-гукавыя даследаванні, паслугі па дагаворах, імунізацыя. За студзень — верасень 2013 года ўстановы аховы здароўя атрымалі 1439,4 мільёна рублёў, або 55,5 працэнта ад удзельнай вагі ўсіх пазабюджэтных паступленняў.

Варта заўважыць, што парадак фарміравання пазабюджэтных сродкаў, ажыццяўлення расходаў, звязаных з дзейнасцю, што прыносіць даходы, а таксама парадак накіравання і выкарыстання названых вышэй сродкаў, якія застаюцца ў распараджэнні бюджэтнай арганізацыі, вызначаецца Урадам Рэспублікі Беларусь. Пры гэтым артыкулам 79 Бюджэтнага кодэкса за незаконнае атрыманне, нямэтавае выкарыстанне сродкаў бюджэту, а таксама за выкарыстанне сродкаў бюджэту з парушэннем бюджэтнага заканадаўства прадугледжана адказнасць.

Ва ўмовах абмежаваных бюджэтных рэсурсаў неабходна і далей паляпшаць работу па прыцягненні пазабюджэтных паступленняў у бюджэтнай сферы з мэтай замацавання матэрыяльна-тэхнічнай базы арганізацый, зацікаўленасці работнікаў, фінансавання першарадных расходаў.

Да таго ж варта шырэй рэкламаваць і даносіць да патэнцыяльнага спажыўца склад гэтых платных паслуг, каб чалавек меў магчымасць імі скарыстацца. У сваю чаргу, развіваючы попыт насельніцтва, арганізацыі змогуць забяспечыць больш інтэнсіўны рост грашовых паступленняў.

Ірына ЦІХАН,

загадчык сектара планавання і выканання бюджэту

фінансавага аддзела райвыканкама.