Беларусбанк узнагародзіў лепшых

Павелічэнне долі безнаяўных разлікаў з выкарыстаннем банкаўскіх плацежных картак — адна з асноўных задач банкаўскай сістэмы нашай краіны. Мэтанакіраваную работу ў гэтым накірунку з гандлёвымі і сэрвіснымі арганізацыямі праводзіць ААТ “ААБ Беларусбанк”.

Такая дзейнасць актыўна ажыццяўляецца і на Ганцаўшчыне. Ужо добрай традыцыяй стала правядзенне ў ЦБП № 107 філіяла № 802 ААТ “ААБ Беларусбанк” спаборніцтваў сярод прадпрыемстваў гандлю і сэрвісу па павелічэнні долі прыросту безнаяўнага абароту з выкарыстаннем банкаўскіх плацежных картак.

Вось і сёлета ў спаборніцтвах, якія праходзілі з мая па жнівень, прынялі ўдзел 28 арганізацый, што маюць тэрмінальнае абсталяванне банка. Спецыялісты Беларусбанка падлічылі, у якой з іх за гэты час людзі актыўней выкарыстоўвалі пластыкавыя карткі ў якасці плацежнага сродку, і вызначылі лепшых.

Па выніках спаборніцтваў першае месца дасталося магазіну “Сілуэт” райспажыўтаварыства, дзе доля безнаяўных абаротаў павялічылася на 309,5 працэнта. Другое месца заняло ПГСУП “АтлантГандальСэрвіс”. Трэцяй стала гасцініца “Журавушка” КУШВП ЖКГ “Ганцавіцкая РЖКГ”.

І вось у мінулы аўторак намеснік начальніка ЦБП № 107 філіяла № 802 ААТ “ААБ Беларусбанк” Жанна Бярозка, начальнік аддзела рознічнага бізнэсу банка Людміла Занька і начальнік аддзела эканомікі райвыканкама Алена Бараноўская павіншавалі калектыў магазіна “Сілуэт” з перамогай у спаборніцтвах і ўручылі ім каштоўныя падарункі — электрачайнік і чайны сервіз.

На сённяшні дзень сфера абслугоўвання пластыкавых картак дазваляе кліентам ААТ “ААБ Беларусбанк” штодзённа выкарыстоўваць пластыкавыя карткі як паўнацэнны плацежны сродак, які мае намнога больш пераваг, чым наяўныя грашовыя сродкі. Тым больш, што карыстацца пластыкавай карткай Беларусбанка выгадна, зручна і бяспечна.

Уладзімір САКАЛОЎ.

НА ЗДЫМКУ: падчас уручэння падарункаў калектыву магазіна “Сілуэт”.

Фота аўтара.