ЧЫСЦІНЯ НАВОКАЛ

Хутка настане зіма. Падрыхтоўка да яе актыўна вядзецца ўжо зараз. Уцяпляюцца будынкі, наводзіцца парадак у дварах і на тэрыторыях прадпрыемстваў, устаноў і арганізацый Ганцаўшчыны.

У цяперашні час у вобласці і раёне праводзіцца месячнік па ўборцы тэрыторый. У гэты перыяд усім арганізацыям, установам, прадпрыемствам, індывідуальным домаўладальнікам, жыхарам шматпавярховых дамоў неабходна арганізаваць уборку ўласнай тэрыторыі і той, якая замацавана за імі рашэннем райвыканкама.

Нагадаю жыхарам індывідуальных домаўладанняў, што ўборка прылягаючай тэрыторыі павінна ажыццяўляецца да сярэдзіны праезнай часткі там, дзе ўборка не праводзіцца камунальнай службай, і да праезнай часткі, дзе яна прыбіраецца камунальнікамі. Прытым рабіць гэта неабходна рэгулярна, у залежнасці ад забруджвання, і ў абавязковым парадку па чацвяргах.

Нягледзячы на тое, што аб’яўлены месячнік па ўборцы тэрыторый, усё яшчэ назіраецца засмечанасць асобных тэрыторый, асабліва ў сельскіх населеных пунктах і на ўскраінах горада. І калі некалькі гадоў таму людзям і сапраўды не было куды выкідваць смецце, то сёння гэта пытанне вырашана як у горадзе, так і ў вёсках: усе вуліцы райцэнтра і сельскіх населеных пунктаў ахоплены рэгулярным цэнтралізаваным вывазам камунальных адходаў. У Ганцавічах смецце вывозіцца штотыднёва, у вёсках — два разы ў месяц і ў любы час — па заяўках. На жаль, не ўсе жыхары памятаюць пра гэта і працягваюць засмечваць бытавымі адходамі прылягаючыя да горада лясныя зоны адпачынку, меліярацыйныя каналы, тэрыторыі, дзе размяшчаюцца гаражы, і, наогул, суседскія двары.

Нясвоечасова арганізоўваюць уборку тэрыторыі старшыні жыллёва-будаўнічых кааператываў, асабліва тых дамоў, што прылягаюць да вуліц Кастрычніцкай і Будаўнікоў. Старшыні вышэйзгаданых ЖБСК неаднаразова прыцягваліся да адміністрацыйнай адказнасці, і некаторыя ўсё ж зрабілі правільныя вывады і аформілі на працу прыбіральшчыкаў тэрыторыі.

Яшчэ раз нагадаю, што рашэннем райвыканкама на Ганцаўшчыне ўстаноўлены санітарны дзень — чацвер, калі кіраўнікі прадпрыемстваў, арганізацый, устаноў, домаўладальнікі павінны праводзіць уборку прылягаючых тэрыторый, у тым ліку тратуараў, дарог, газонаў.

У перыяд лістападу неабходна ачышчаць тратуары і праезную частку ад апаўшага лісця кожны дзень, таму што ўтаптаныя, мокрыя лісты потым прыбіраць даволі цяжка. Вывозіць складзіраванае  лісце неабходна па меры яго накаплення і ў абавязковым парадку па чацвяргах.

Паважаныя жыхары горада і раёна! Давайце зробім так, каб наша Ганцаўшчына была чыстай і прыгожай!

Аляксандр САЛЯНІК,

галоўны дзяржаўны санітарны ўрач раёна.