Страхавыя ўзносы — пад прымусам?

Фонд сацыяльнай абароны насельніцтва (далей — Фонд) збірае і акумулюе сродкі дзяржаўнага сацыяльнага страхавання, своечасова і ў поўным аб’ёме фінансуе выплаты пенсій і дапамог.

У цяперашні час назіраецца такая негатыўная тэндэнцыя, як рост пратэрмінаванай запазычанасці па плацяжах у Фонд. І гэта не можа не трывожыць.

Некаторыя работадаўцы парушаюць заканадаўства па выплаце страхавых узносаў: робяць гэта нясвоечасова, не ў поўным аб’ёме або зусім іх не выплачваюць. І гэта з’яўляецца асноўнай прычынай пратэрмінаванай запазычанасці па плацяжах у бюджэт Фонду.

Варта адзначыць, што калі работадаўца пералічвае ўзносы не ў поўным аб’ёме або зусім іх не выплачвае, у работнікаў не фарміруецца права на сацыяльныя выплаты, уключаючы пенсіі. У выніку няплата або няпоўная выплата ўзносаў негатыўна адаб’ецца на памеры пенсій або дапамог.

 Асабліва актуальна гэта цяпер, пасля прыняцця Указа Прэзідэнта Рэспублікі Беларусь ад 3 верасня 2013 года № 389, згодна з якім павялічаны мінімальны стаж для атрымання працоўнай пенсіі. Так, з наступнага года, каб зарабіць працоўную пенсію па ўзросце, патрэбна будзе плаціць страхавыя ўзносы не менш за 10 гадоў. Сёння гэты паказчык складае 5 гадоў.

У сувязі з гэтым працэс забеспячэння поўнага збору плацяжоў на дзяржаўнае сацыяльнае страхаванне знаходзіцца пад пастаянным кантролем органаў Фонду. У тым ліку праводзяцца праверкі плацельшчыкаў страхавых узносаў на прадмет выканання імі заканадаўства па выплаце абавязковых плацяжоў і правільнага расходавання сродкаў дзяржаўнага сацыяльнага страхавання. З плацельшчыкаў-даўжнікоў спагнанне запазычанасці ажыццяўляецца ў бяспрэчным парадку. На суму нядоімкі налічваецца пеня ў памеры 1/360 стаўкі рэфінансавання Нацбанка Рэспублікі Беларусь за кожны дзень пратэрміноўкі плацяжу. Да плацельшчыкаў-парушальнікаў заканадаўства і іх службовых асоб, у адпаведнасці з артыкулам 11.54 Кодэкса аб адміністрацыйных правапарушэннях, прымяняюцца адміністрацыйныя штрафы ў памеры 20 працэнтаў ад сумы няплаты.

Так, Ганцавіцкім раённым аддзелам Фонду за 9 месяцаў 2013 года за парушэнне заканадаўства па выплаце страхавых узносаў да адміністрацыйнай адказнасці прыцягнуты 6 індывідуальных прадпрымальнікаў і 4 прадпрыемствы на агульную суму 96 мільёнаў 367 тысяч 888 беларускіх рублёў.

Работнікі і наймальнікі, а таксама асобы, якія самастойна выплачваюць абавязковыя плацяжы ў Фонд, павінны разумець важнасць страхавых узносаў і тое, што ад іх залежаць своечасовыя выплаты цяперашнім атрымальнікам. А паўната пералічэнняў плацяжоў у бюджэт Фонду з’яўляецца абавязкам законапаслухмяных суб’ектаў гаспадарання і не павінна дасягацца пры дапамозе штрафных санкцый.

 Алена ХІЛЮЦІЧ,

 начальнік Ганцавіцкага раённага аддзела

 Фонду сацыяльнай

 абароны насельніцтва.