З АПЕРАТЫЎНЫХ ЗВОДАК ТЫДНЯ

СВЯТЛАФОР ДАІ

За кіраванне транспартнымі сродкамі ў стане алкагольнага ап’янення на мінулым тыдні затрыманы: жыхар вёскі Любашава, сацыяльны работнік Сяргей Іванавіч Чыркун, які кіраваў мотаблокам; жыхар вёскі Ганцавічы, вартаўнік СВК “Бярозавец” Канстанцін Аляксандравіч Мелехавец, які кіраваў трактарам; жыхар вёскі Чудзін, механізатар СВК “Будча” Аляксандр Фёдаравіч Каско; непрацуючы жыхар вёскі Раздзялавічы Міхаіл Міхайлавіч Варвашэвіч, які кіраваў матацыклам.

МІЛІЦЫЯ

Затрыманы

з наркотыкам

Позна вечарам 10 верасня на тэрыторыі спартыўнага гарадка сярэдняй школы № 3 г. Ганцавічы быў затрыманы дваццацігадовы гараджанін Эдуард Д., у якога знайшлі 0,79 грама здробненага рэчыва жоўта-зялёнага колеру расліннага паходжання. Як паказала экспертыза, у яго складзе аказаўся небяспечны псіхатропны наркотык. У дачыненні да грамадзяніна ўзбуджана крымінальная справа.

“Паляванне”

на веласіпеды

Адразу 4 крымінальныя справы ўзбуджаны на мінулым тыдні па фактах крадзяжу веласіпедаў. Так,  жыхарка райцэнтра 20 верасня пакінула паблізу адміністрацыйнага будынка ААТ “Горск” новы веласіпед “Стэлс”, які бясследна знік. Кошт украдзенага пацярпелая ацаніла ў 1400000 рублёў. У гэты ж дзень з пад’езда шматкватэрнага дома № 10 па вуліцы Будаўнікоў укралі дарожны складны веласіпед “Аист”, які “пацягнуў” на 500 тысяч рублёў. Яшчэ адзін веласіпед “Стэлс” коштам 1100000 рублёў укралі 29 верасня. Жанчына пакінула свой транспарт каля філіяла ААТ “ААБ Беларусбанк”, што знаходзіцца па вуліцы Кастрычніцкай у райцэнтры. А вось з 9 на 10 кастрычніка з пад’езда шматкватэрнага дома № 37 па вуліцы Паркавай знік трохколавы дзіцячы веласіпед коштам 1 мільён рублёў.

РАЙАДДЗЕЛ СЛЕДЧАГА

КАМІТЭТА

Укралі сабак

Ноччу з 10 на 11 кастрычніка з вальера аднаго з аматараў палявання з вёскі Хатынічы нехта ўкраў двух паўтарагадовых паляўнічых сабак — лаек, аб чым і паведаміла ў міліцыю маці пацярпелага. Дарэчы, кошт пародзістых лаек можа вагацца ад некалькіх соцень да некалькіх тысяч долараў ЗША.

Ухіліст

ад аліментаў

У адносінах да аднаго з жыхароў райцэнтра, Аляксея Б., узбуджана крымінальная справа за ўхіленне ад выплаты аліментаў на ўтрыманне непаўналетніх дзяцей.