Прафесіянал кніжнай справы

Дзверы гарадскога філіяла цэнтральнай раённай бібліятэкі імя В. Ф. Праскурава, што знаходзіцца ў залінейнай частцы нашага горада, заўсёды адчынены для тых, хто любіць вабіць свой час за кнігай. З густам аформленыя кніжныя паліцы, сучасная тэхніка, навінкі літаратуры і свежая прэса — усё гэта заманьвае чытачоў наведацца сюды неаднойчы.  А такое хараство і камфортныя ўмовы для наведвальнікаў, якіх, дарэчы, тут налічваецца 700 чалавек, стварае прафесіянал сваёй справы — бібліятэкар Тамара Курылік. Жанчына ўмее знайсці падыход да кожнага чытача, ад самага малодшага да чалавека сталага ўзросту, хутка і прафесіянальна выканаць яго запыты.

Для юных чытачоў бібліятэкар арганізоўвае разнастайныя конкурсы, віктарыны, бібліятэчныя акцыі. А дзеці з’яўляюцца для гаспадыні ўстановы добрымі памочнікамі ў рамонце літаратуры, правядзенні мерапрыемстваў. Рабяты дзеляцца з ёй і сваімі поспехамі ў вучобе, расказваюць пра адносіны з сябрамі і нават аб праблемах.  А жанчына ўважліва іх выслухае, кагосьці пахваліць, а камусьці паспачувае ці слушную параду дасць.

Асабліва падабаецца наведваць бібліятэку людзям сталага ўзросту. Няспешна выбіраючы кнігі, яны абавязкова спытаюць парады ў Тамары Фёдараўны, якая за сваю практыку вывучыла і дасканала ведае інтарэсы кожнага. Да таго ж да людзей старэйшага пакалення жанчына адносіцца з пачуццём асаблівай пяшчоты. Гутаркі з мудрымі, вопытнымі людзьмі дапамагаюць ёй не толькі ў працы, але і ў асабістым жыцці.

Дарэчы, некалькі гадоў назад пры бібліятэцы быў арганізаваны клуб па інтарэсах “Залатая пара”, які аб’яднаў людзей пажылога ўзросту. У выхадны дзень яго ўдзельнікі збіраюцца за кубачкам гарбаты на мерапрыемствы, якія праходзяць у цёплай, сяброўскай атмасферы. Дбайныя гаспадыні дзеляцца рэцэптамі кулінарнага майстэрства, кветкаводства, вышыўкі, пашыву. Арганізоўваюцца ў бібліятэцы і творчыя выставы ўдзельнікаў клуба “Залатая пара”. Так, на адной з іх — “Ручнікоў яе льняныя крылы” — былі прадстаўлены работы народнага майстра Беларусі Ніны Казак. Таксама кожны член клуба меў магчымасць паказаць свае работы на выставе “Наша майстэрства — Калядам”. Такія мерапрыемствы дазваляюць не толькі паўдзельнічаць у іх, але і адкрыць для сябе таленты іншых людзей, што жывуць побач.

Таму спяшаюцца ў бібліятэку людзі не толькі па карысную інфармацыю, але каб сустрэцца з творчасцю чытачоў, дакрануцца душой да мастацтва і з задавальненнем правесці свой вольны час. А таксама — сустрэцца з ветлівай гаспадыняй установы Тамарай Фёдараўнай, добрым дарадцам і выдатным прафесіяналам, які ўмее разгледзець у кожным чытачу асобу.

Таццяна МАЛЯЎКА,

загадчык

аддзела

бібліятэчнага

 маркетынгу

 Ганцавіцкай РЦБС.

НА ЗДЫМКУ: бібліятэкар гарадскога філіяла ЦРБ імя В. Ф. Праскурава Т. Ф. Курылік.