Праблемы вырашаць нам

Звароты грамадзян да ўлады — адзін з важнейшых механізмаў “зваротнай сувязі” паміж імі. Таму перад мясцовымі выканаўчымі органамі ставіцца задача — зрабіць сістэму дыялогу найбольш эфектыўнай.

Чалавек можа накіраваць пісьмовы зварот непасрэдна ў той орган ці адказнай асобе, у кампетэнцыі якіх знаходзіцца вырашэнне пастаўленых пытанняў. Пры неабходнасці, у пацвярджэнне сваіх аргументаў, грамадзянін прыкладае да звароту дакументы і матэрыялы альбо іх копіі.

Указам Прэзідэнта Рэспублікі Беларусь ад 15 кастрычніка 2007 года № 498 “Аб дадатковых мерах па рабоце са зваротамі грамадзян і юрыдычных асоб” вызначаны прынцып першачарговасці разгляду зваротаў непасрэдна на месцах. Зацверджаны пералік арганізацый, якія адказваюць за разгляд зваротаў у канкрэтных сферах жыццядзейнасці.

Так, калі на асабістым прыёме ці па пісьмовым звароце высвятляецца, што пытанне, з якім звярнуўся чалавек, адносіцца да кампетэнцыі іншых органаў, яму паведамляецца, куды перанакіраваны яго зварот ці куды варта звярнуцца. Грамадзяне іншы раз не разумеюць: пісалі ў рэспубліканскі ці абласны дзяржаўны орган, а адказ атрымалі з раённага. Гэта якраз і ёсць прынцып першачарговасці разгляду зваротаў.

Часта людзі думаюць, што калі зварот накіраваць адразу ў абласныя ці рэспубліканскія органы ўлады, то пытанне будзе вырашана станоўча. Аднак сёлета з 12 зваротаў, якія паступілі ў вышэйстаячыя дзяржорганы і былі накіраваны для разгляду ў райвыканкам, толькі адзін быў задаволены. Варта зразумець, што ўсе паступаючыя пытанні вырашаюцца з улікам дзеючага заканадаўства і, адпаведна, фінансавання.

Грамадзянін, калі ён не згодны з атрыманым адказам, мае права абскардзіць яго ў вышэйстаячым дзяржаўным органе, якім улічваецца, ці быў разгледжаны зварот на мясцовым узроўні. У сваю чаргу, рашэнне вышэйстаячага дзяржоргана па звароце можа быць абскарджана ў судзе.

У райвыканкам паступаюць некаторыя звароты толькі таму, што грамадзяне не валодаюць сітуацыяй. Дастаткова растлумачыць чалавеку парадак разгляду пытання ці даць юрыдычную кансультацыю — і неабходнасць  падачы пісьмовага звароту адпадае.

Значная ўвага райвыканкамам удзяляецца павышэнню эфектыўнасці асабістага прыёму грамадзян. Штогод зацвярджаюцца графікі прыёму. У адпаведнасці з Указам № 498, старшыня раённага выканаўчага камітэта праводзіць асабісты прыём грамадзян у другую і чацвёртую сераду месяца з 8 да 14 гадзін. Таксама ў адпаведнасці з графікамі прыёмы грамадзян праводзяць намеснікі старшыні, начальнікі ўпраўленняў і аддзелаў райвыканкама.

Для аператыўнага вырашэння ўзнікшых праблем грамадзяне маюць магчымасць звярнуцца на “гарачую лінію” райвыканкама. З пачатку 2013 года на яе патэлефанавалі 85 чалавек. У зваротах узнімаліся пытанні рамонту дарог, водазабеспячэння, цеплазабеспячэння, добраўпарадкавання дваровых тэрыторый і іншыя. Па ўсіх зваротах прыняты меры рэагавання, а грамадзяне атрымалі паведамленні аб выніках разгляду.

Пастаянна праводзяцца і “прамыя тэлефонныя лініі” з кіраўніцтвам раёна. Людзі актыўна выкарыстоўваюць такую форму зваротаў. Падчас правядзення “прамых ліній” да старшыні і яго намеснікаў з праблемнымі пытаннямі звярнуліся 38 чалавек.

Нагадаем жыхарам раёна, што “гарачая лінія” райвыканкама працуе штодзённа з 8 да 20 гадзін па тэлефоне 2-12-91. Таксама ў рабочыя дні з 8 да 13 гадзін і з 14 да 17 гадзін можна звярнуцца ў сектар па рабоце са зваротамі грамадзян і юрыдычных асоб райвыканкама  па  тэлефоне 2-42-68. Накіроўваць свае звароты можна і на афіцыйныя электронныя адрасы Ганцавіцкага райвыканкама: [email protected] ці [email protected]

У райвыканкаме таксама працягвае працаваць грамадская юрыдычная прыёмная, у якой у адпаведнасці з графікам (кожны аўторак з 11 да 13 гадзін) ажыццяўляюць дзяжурствы спецыялісты раённых службаў. Людзі маюць магчымасць атрымаць бясплатную юрыдычную кансультацыю па прававых пытаннях.

Валерыя ЮДЗІЦКАЙТЭ,

загадчыца сектара

па рабоце са зваротамі грамадзян

і юрыдычных асоб

райвыканкама.