Надыходзіць ацяпляльны сезон

З пачаткам халадоў  штогод павялічваецца і колькасць пажараў, прычынай якіх становіцца няспраўнасць печаў ацяплення.

Статыстыка сведчыць, што ўзгаранні, выкліканыя няспраўнасцю пячнога ацяплення, складаюць да 25 працэнтаў ад агульнай колькасці пажараў у год. Па згаданай прычыне сёлета ўжо адбыліся 3 пажары.

Пакуль ацяпляльны сезон не пачаўся, усім домаўладальнікам і кватэранаймальнікам неабходна праверыць спраўнасць ацяпляльных прыбораў, печаў і, пры неабходнасці, адрамантаваць іх.

Нагадаем, што найбольш распаўсюджанымі прычынамі ўзнікнення пажараў становяцца: няспраўнасць печаў, іх перагарт, захоўванне на печах гаручых матэрыялаў, парушэнне правілаў эксплуатацыі печаў.

У адпаведнасці з правіламі пажарнай бяспекі Рэспублікі Беларусь “Для жылых будынкаў, інтэрнатаў, індывідуальных гаражоў і садоўніцкіх таварыстваў”, пры эксплуатацыі печаў ацяплення катэгарычна забараняецца:

— выкарыстоўваць у печах на гарышчы дома металічныя, керамічныя ці азбестацэментныя трубы;

— пакідаць без нагляду працуючую печ;

— выкарыстоўваць для ацяплення дровы, большыя за памер топкі;

— распальваць печы гаручымі вадкасцямі;

— сушыць на печах адзенне, дровы і іншыя гаручыя матэрыялы;

— пакідаць у час прапальвання печы без нагляду малых дзяцей;

— эксплуатаваць печы, якія маюць тэхнічныя няспраўнасці;

— складзіраваць на гарышчы дома гаручыя матэрыялы.

Нагадваем, што для прадухілення ўзгарання ў выпадку выпадання вуглёў з печкі, неабходна прыбіць пад топачнай дзверцай бляшаны ліст  памерам не менш чым 50 на 70 сантыметраў. Акрамя таго, рэкамендуем звярнуць увагу на правільнасць абуладкавання ацяпляльна-варачных печаў у гаспадарчых пабудовах і месцаў устаноўкі кормазапарнікаў.

Толькі строгае захоўванне правілаў пажарнай бяспекі і ўласная асцярожнасць дазволяць пазбегнуць трагедый, а выкарыстанне аўтаномных пажарных апавяшчальнікаў дапаможа выявіць узгаранне на самай ранняй стадыі.

Аляксандр

Парфеявец,

інспектар

раённага аддзела па надзвычайных

сітуацыях.