НАСТАЎНІЦА І ЯЕ ВУЧАНЬ

Сёлета ў першым класе Чудзінскай сярэдняй школы вучыцца толькі адзін вучань. Завуць першакласніка Арсеній Савеня. А першую настаўніцу хлопчыка — Святлана Мікалаеўна Цалагуз.

— Прызнаюся шчыра, вельмі непрывычна, калі прыходзіш у клас, а цябе сустракае толькі адзін вучань, — кажа Святлана Мікалаеўна. — У класе, у якім перад гэтым я выкладала, было пяць чалавек. І нават тады здавалася, што дзяцей мала. Бо самым першым маім выпускам быў клас з пятнаццаці вучняў. Аднак нічога, будзем прывыкаць. Тым больш, што Арсеній — хлопчык разумны і паслухмяны. Ён самы малодшы ў шматдзетнай сям’і, дзе бацькі выхоўваюць чацвёра дзяцей. Добрая сям’я, добрыя дзеці. Арсеній у свае шэсць гадоў ужо шмат чаго ведае, адказвае на ўсе мае пытанні. Зараз у нас месяц уводзін у школьнае жыццё. Пасля ўрокаў Арсеній застаецца да вечара ў старэйшай групе дзіцячага сада. Дарэчы, у дашкольнай установе ён шмат чаму навучыўся. Бываю, тлумачу яму штосьці, а ён кажа: “Я ведаю, мне пра гэта расказвалі ў садку!”. Адным словам, думаю, што з вучнем мне пашанцавала. Будзем вучыцца!

Яшчэ Святлана Мікалаеўна расказала, што ў яе зараз таксама, як і ў Арсенія, своеасаблівы “перыяд адаптацыі”. Толькі не да школы, а да таго, што вось ужо і малодшы сын паехаў з бацькоўскай хаты на вучобу. Улад пасля заканчэння дзявятага класа паступіў у кадэцкае вучылішча.

— Гэта была яго мара з шостага класа, — кажа Святлана Мікалаеўна. — І я вельмі рада, што яна здзейснілася! Толькі ж непрывычна, што ўжо і малодшы сын амаль дарослы…

Дарэчы, старэйшая дачка настаўніцы Наталля працуе бухгалтарам у мясцовым лясніцтве, сярэдняя Кацярына скончыла медыцынскі каледж.

Пагутарылі і з Арсеніем. Хлопчык таксама лічыць, што яму пашанцавала з настаўніцай. На ўроках, кажа ён, цікава і ні кропелькі не сумна. А яшчэ прызнаўся, што ў вольны час вельмі любіць катацца на веласіпедзе. А калі навучыцца чытаць, Арсеній плануе ў першую чаргу прачытаць усе кніжкі пра прыроду…

Тэкст і фота Яніны Ткачук.